Qyzylorda qalasynda Qazaqstan Respýblıkasy quqyq qorǵaý, arnaıy organdary men kúshtik qurylymdary qyzmetkerleri arasynda shaǵyn fýtboldan "Qazaqstan Respýblıkasy Ishki ister mınıstriniń kýbogyna" arnalǵan respýblıkalyq týrnır óz jalaýyn kóterdi. Atalǵan sporttyq doda 2025 jylǵa arnalǵan kúntizbelik jospar aıasynda jáne "Dınamo" dene shynyqtyrý-sport qoǵamynyń 100 jyldyǵyna oraı uıymdastyrylyp otyr.
Týrnırdiń ashylý saltanatynda Qyzylorda oblysy polısııa departamentiniń Serik Ergeshov sóz sóılep, qatysýshylarǵa sáttilik tiledi:
-Qurmetti týrnır qatysýshylary men qadirli áriptester! Sizderdi elimizdiń quqyq qorǵaý, arnaıy organdary men kúshtik qurylymdary qyzmetkerleri arasynda uıymdastyrylyp otyrǵan Ishki ister mınıstriniń kýbogyna arnalǵan shaǵyn fýtbol týrnıriniń ashylýymen shyn júrekten quttyqtaımyn, - dedi ol.
Bul týrnır – tek kásibı biliktilikti emes, sporttaǵy sheberlik pen aýyzbirshilikti pash etetin mańyzdy shara. Mundaı jarystar salaýatty ómir saltyn nasıhattap, uıymshyldyqty arttyra otyryp, qyzmettik mindetterdi abyroımen atqarýǵa jańa serpin beredi.
-Barshańyzǵa ádil ári tartysty oıyn, jaraqatsyz jarys jáne tolaǵaı tabys tileımin. Bul týrnır dostyq pen áriptestikti nyǵaıtyp, elge qyzmet etýdiń jarqyn úlgisine aınalsyn, – dedi departament basshysy.
Saltanatty shara barysynda arnaıy shaqyrylǵan mártebeli meımandar – "Dınamo" DShSQ ortalyq keńesiniń sport basqarmasynyń bastyǵy Gúláıim Mahatqyzy, "Dınamo" DShSQ basqarmasynyń bastyǵy Vladımır Marın jáne qazaq sportynyń maqtanyshy, Afına Olımpıadasynyń chempıony, Qyzylorda oblysynyń dene shynyqtyrý, sport jáne týrızm basqarmasynyń basshysy Baqtııar Artaev ta quttyqtaý lebizderin bildirip, qatysýshylarǵa sáttilik tiledi.
Týrnırdiń ashylý saltanatynda jergilikti ónerpazdar óner kórsetip, kórermenderge kóterińki kóńil kúı syılady.
Eki kúnge sozylatyn bul jarysqa elimizdiń túkpir-túkpirinen kelgen 11 komanda qatysýda. Shaǵyn fýtboldyń sheberleri jasyl alańda ózara myqtyny anyqtap, jeńis tuǵyrynan kórinýge bar kúsh-jigerin salmaq.
