Kúni keshe Semeıde salynatyn oblystyq kópsalaly aýrýhananyń irgetasyn qalaý rásimi boldy. Igilikti is-sharaǵa oblys ákimi Berik Ýálı jáne osy salanyń ardagerleri, dárigerler qatysty.
«Prezıdenttiń tapsyrmasyna sáıkes boı kóteretin ǵımarat Abaı oblysyn damytýdyń keshendi josparyna engen. 300 tósek-oryndyq jańa kópsalaly aýrýhanada bir aýysymda 250 adamdy qabyldaıtyn keńes berý jáne tekserý bólimi jumys isteıtin bolady», deıdi oblys ákiminiń baspasóz qyzmeti.
Aımaq basshysy bul medısınalyq nysannyń óńir turǵyndary úshin mańyzy zor ekenin jetkizdi.
«Abaı oblysy – erteden dárigerlik dástúri qalyptasqan óńir. Aımaǵymyzdan shyqqan bilikti mamandar qazaq medısınasynyń negizin qalady. Alaıda, sońǵy shırek ǵasyrda bul sala nazardan tys qalyp, bilikti mamandardyń basqa óńirlerge qonys aýdarǵanyn da jasyra almaımyz. Sondyqtan bul aýrýhananyń irgetasyn qalaý – sol úzilgen dástúrdi qaıta jalǵaýdyń nyshany. Merdiger kompanııa ókilderi atap ótkendeı, aýrýhana zamanaýı medısınalyq tehnologııalarmen jabdyqtalatyn bolady. Biz bul kúndi asyǵa kúttik. О́ıtkeni, oblysymyzda osy ýaqytqa deıin osyndaı aýrýhana bolǵan emes. Endi, mine sol olqylyqtyń orny toldy. О́ńir turǵyndary atynan Memleket basshysyna alǵys bildiremiz», dedi oblys ákimi.
Abaı oblysynda búginde 31 stasıonarlyq medısınalyq uıym jumys isteıdi, onyń ishinde 20-sy memlekettik, 11-i jekemenshik. Aımaq kóleminde ár 10 myń turǵynǵa nebári 59 tósek-orynnan keledi. Bul – elimizdegi eń tómengi kórsetkishterdiń biri.
Oblystyq mamandandyrylǵan medısınalyq qyzmettiń 70 paıyzy Semeı qalasynda shoǵyrlanǵan. Qazirgi stasıonarlardyń basym bóligi eski, materıaldyq-tehnıkalyq bazasy tozǵan. Jedel medısınalyq járdem aýrýhanasy 300 tósekke shaqtalǵanymen is júzinde 375 naýqasty qabyldap otyr. Kardıologııa, ınsýlt, gınekologııa, toksıkologııa, nevrologııa, travmatologııa bólimderinde tósek-oryn tapshy. Jańa aýrýhana osy tapshylyqty joıyp, zamanaýı talaptarǵa saı medısınalyq kómek kórsetýdi qamtamasyz etedi. Sonymen qatar, aýyl turǵyndary úshin qashyqtan keńes beretin telemedısına ortalyǵy qurylady. Medısınalyq nysan 2027 jyly paıdalanýǵa berilmek.
Abaı oblysy
