Festıvaldiń ashylý saltanatynda Mádenıet jáne aqparat mınıstri Aıda Balaevanyń quttyqtaýy oqyldy. Festıval teatr óneriniń damýyna yqpal etetin sharaǵa aınalatyndyǵyna zor senim artqan mınıstr stýdentter shyǵarmashylyǵyna sát-sapar tiledi.
Festıvaldiń ashylýynda TÚRKSOI Bas hatshysy Sultan Raev jáne Ázerbaıjan, Qazaqstan, Qyrǵyzstan, О́zbekstan, Túrkııa jáne Túrikmenstannan kelgen joǵary oqý oryndarynyń rektorlary sharanyń stýdentter shyǵarmashylyǵyn arttyrýmen halyqaralyq mádenı,rýhanı baılanystardyń damýyna zor yqpaly týraly aıtyp ótti.
Akademııanyń rektory Arman Júdebaev Temirbek Júrgenov atyndaǵy Qazaq ulttyq óner akademııasynyń ujymy osy bedeldi festıval men qaýymdastyq otyrysyn joǵary deńgeıde ótkizýge barlyq shyǵarmashylyq qajyryn jumsap otyrǵanyna toqtaldy. «Biz bul is-shara mádenı-shyǵarmashylyq tájirıbe almasý úshin mańyzdy alańǵa aınalatynyna, jas talanttar arasyndaǵy dostyq baılanysty nyǵaıtýǵa múmkindik beretinine jáne túrki áleminiń teatr ónerin damytýǵa úles qosatynyna senimdimiz» dedi rektor.
Festıval aıasynda TÚRKSOI uıymyna múshe elderdiń shyǵarmashylyq joǵary oqý oryndary qaýymdastyǵynyń kezekti otyrysy ótedi. Bul otyrysta teatrlyq bilim berýdi damytýdyń ózekti máseleleri, oqytý ádistemelerimen almasý jáne qatysýshy joǵary oqý oryndary arasyndaǵy yntymaqtastyqty odan ári nyǵaıtý men keleshek jańasha baǵyttar talqylanady.
20-22 mamyr kúnderi ótetin festıval aıasynda túrki álemi elderi stýdentteriniń qoıylymdary, sheteldik jáne otandyq teatr óneriniń jetekshi qaıratkerleriniń sheberlik synyptary ótedi.
Tájirıbe almasýǵa jáne qatysýshylardyń talantyn kórsetýge baǵyttalǵan shyǵarmashylyq kezdesýler festıvaldiń mańyzyn arttyra túspekshi.
Túrkitildes elder arasyndaǵy mádenı baılanysty nyǵaıtý men stýdentter teatrynyń shyǵarmashylyǵyn damytý jáne kásibı dıalog alańyn qurýdy maqsat etken festıval ónertaný, mýzykataný, taǵy basqa salalarda tyń jobalarǵa jol ashatyny anyq.
Almaty
