Erbolat Zamanbekuly Shaldybekov — 1977 jyly 5 mamyrda Almaty oblysy, Uıǵyr aýdanyna qarasty Aqtam aýylynda dúnıege kelgen. Jastaıynan án ónerine jaqyn bolyp ósken ol 1995–1998 jyldary J.Elebekov atyndaǵy Respýblıkalyq estrada jáne sırk kolledjinde, odan soń Qurmanǵazy atyndaǵy Qazaq ulttyq konservatorııasynda bilim alyp, dástúrli án óneriniń kásibı ókili retinde qalyptasty. Keıinnen osy oqý ornynda magıstratýrany támamdap, ónertaný ǵylymdarynyń magıstri dárejesin ıelendi.
1994 jyldan bastap óner jolyn bastaǵan ónerpaz el ishinde dástúrli ónerdiń dáripteýshisi retinde keńinen tanyldy. Búginde Qazaq ulttyq óner ýnıversıtetinde dástúrli án kafedrasynda ustazdyq qyzmette jáne R.Baǵlanova atyndaǵy «Qazaqkonsert» memlekettik-akademııalyq konserttik uıymynda solıst bolyp eńbek etýde.
О́ner ıesiniń shyǵarmashylyq jetistikteri de az emes. Ol — Kenen Ázirbaev, Júsipbek Elebekov atyndaǵy respýblıkalyq baıqaýlardyń laýreaty, halyqaralyq “Shabyt” festıvaliniń jeńimpazy. «Qazaqtyń myń áni», «Qazaqtyń batyrlyq dastandary» sııaqty ulttyq jınaqtarǵa birneshe shyǵarmasy engen. EXPO–2017 halyqaralyq kórmesi, «Astana arqaýy», «Qorqyt jáne uly dala sazy», «Uly dala oıyndary» sııaqty aýqymdy mádenı sharalarda óner kórsetip, dástúrli án óneriniń nasıhattalýyna úlken úles qosty.
Buǵan deıin ol «Qazaqstan Respýblıkasynyń Mádenıet qaıratkeri» ataǵyna, túrli gramotalar men marapattarǵa ıe bolǵan.
Endi mine, ulttyq ónerdi ulyqtap, urpaqqa jetkizýdegi eren eńbegi elenip, «Qazaqstannyń eńbek sińirgen qaıratkeri» ataǵy berilip otyr. Bul — ánshi shyǵarmashylyǵynyń ǵana emes, tutas dástúrli ónerdiń baǵalanýynyń aıqyn kórinisi.
