«Keleshek mektepterdiń» qatary kóbeıedi

Ulttyq jobanyń sharapatyn al­ǵash­qylardyń biri bolyp Baı­zaq aýdanynyń halqy sezindi. О́tken oqý jylynyń basynda oblys orta­lyǵy Taraz qalasymen irgeles jatqan aýdannyń ortalyǵy Sarykemer aýylynda sý jańa bilim ordasy paıdalanýǵa berildi. Osylaısha, kópten beri aıtylyp kelgen sarykemerlikterdiń máselesi ońynan she­shilip, bilim alýshylar jańa bilim orda­synyń tabaldyryǵynan attady.

Prezıdent tapsyrmasyna sáıkes boı kótergen jańa nysan rasynda da qala mektepterinen bir mysqal kem emes. Júr­gi­zilgen qurylys jumysynyń sapasy kóńilge qonady. Resmı derekke jú­gin­sek, bilim ordasy 600 oqýshyǵa shaq­talyp salynǵan. Munda jetkinshekterdiń sapaly bilim alýy úshin barlyq jaǵdaı qarastyrylǵan. Zamanaýı úlgidegi kabınetter ozyq tehnologııanyń sońǵy úlgisimen jabdyqtalǵan.

Naqtyraq aıtsaq, jańa ǵımaratta 35 oqý bólmesi, 2 sport zal, 2 kompıýter kabıneti, májilis zaly, kitaphana jáne ashana, uldar men qyzdarǵa arnalǵan jeke she­berhanalar qarastyrylǵan. Sony­men qatar balalarǵa oqýlyqtar men jeke zattaryn saqtaýǵa arnalǵan shkaf­tar ornalastyrylypty. «Keleshek mek­tepteri» ulttyq jobasy aıasynda salyn­ǵan jańa nysan tolyqqandy beınekameramen qamtylǵan. Sondaı-aq jedelsaty ornatylǵan.

Aýdan ortalyǵynda boı kótergen jańa nysandy «Samruk-Kazyna Construction» AQ-nyń tapsyrysy negizinde «Taraz qu­rylys dızaın» JShS salǵan. Seriktestik 600 oqýshyǵa arnalǵan ǵımarat qurylysyn ýaqyt talabyna saı júrgizgeni kózge kórinip tur.

Oblys ortalyǵy Taraz qalasyndaǵy irgeli shaǵyn aýdandardyń biri – «Báıte­rek». On jyldan astam ýaqyt buryn boı kótergen shaǵyn aýdanda myńdaǵan halyq qonystanǵan. «Báıterek» turǵyndary­nyń suranysyn qanaǵattandyrý maqsatyn­da jergilikti atqarýshy bılik qoldan kelgenshe jumys atqaryp jatyr. Sonyń bir kórinisi – ótken jyldyń ekinshi jartysynda paıdalanýǵa berilgen jańa mektep.

«Báıterek» shaǵyn aýdanynda boı kótergen №66 mektep ǵımaraty zamanaýı arhıtektýralyq sheshimmen salynǵanyna esh kúmán joq. Alystan kózge shoqtaı basylatyn jańa mektepte oqýshylardyń sapaly bilim alýy úshin barlyq jaǵdaı qarastyrylǵan. 1200 oqýshyǵa shaqtalǵan bilim ordasy jergilikti turǵyndardyń kóńilinen shyqty.

Oblys ákimdiginiń baspasóz qyzmeti keltirgen derekke júginsek, ǵımaratta ınteraktıvti taqtamen qamtylǵan 59 oqý kabıneti bar. Sondaı-aq bilim nysany ashana, 2 sport zal, birneshe zerthanalyq kabınetpen, jaıly kitaphanamen, arnaıy sheberhanalar jáne kovorkıng ortalyqpen qamtylǵan. Budan bólek, qosymsha bilim berý sabaqtaryn ótkizýge arnalǵan kabınetter de bar. «Keleshek mektep» ulttyq jobasy aıasynda salynǵan ǵımaratta erekshe bilim berý qajettiligi bar balalardy ýaqyt talabyna saı oqytý máselesi de nazardan tys qalmaǵan.

Taraz qalasynda jańadan boı kótergen «Uly dala» shaǵyn aýdany elimizdegi eń iri shaǵyn aýdan sanatyna engen. On myńdaǵan halyq shoǵyrlanǵan shaǵyn aýdanǵa birneshe bilim ordasy kerek ekeni belgili. Turǵyndardyń suranysyn eskergen jergilikti atqarýshy bılik ótken jyldyń aıaq tusynda «Keleshek mektep» ulttyq jobasy aıasynda №67 mektepti paıdalanýǵa berdi. Memleket basshysynyń tapsyrmasy aıasynda salynǵan jańa nysanda 1200 oqýshynyń bilim alýyna múmkindik bar.

Resmı derekke zer salsaq, ǵımarat ozyq tehnologııamen jabdyqtalǵan. Mun­da oqý­shylardyń sapaly ári qaýipsiz bi­lim alýyna barlyq jaǵdaı jasalǵan. Bilim or­dasynda ınteraktıvti taqtamen jabdyq­tal­ǵan 59 oqý kabıneti, 3 ashana, 2 sport zal, ki­taphana, 3 zerthana, 2 kompıýter kabı­neti, 3 zerthana jáne 10 kovorkıng orta­lyq bar.

«Eń irgeli shaǵyn aýdan sanalatyn «Uly dalada» úlken mekteptiń salynǵany kóńil qýantady. «Keleshek mektep» ulttyq jobasy aıasynda boı kótergen jańa bilim ordasynyń qurylys jumysyn alǵashqy kirpishi qalanǵan sátten qalt jibermeı qarap otyrdym. Sapasy kóńilge qonady. Munda tórt nemerem bilim nárimen sýsyndap otyr. Zamanaýı úlgidegi mekteptiń salynýyna muryndyq bolǵan Memleket basshysyna alǵystan basqa aıtarym joq», deıdi «Uly dala» shaǵyn aýdanynyń turǵyny Almash Aýǵanbaeva.

Jalpy alǵanda, «Uly dala» shaǵyn aýdanyndaǵy ıgilikti is munymen toqtaǵan joq. Osy jyldyń sáýir aıynda ulttyq joba aıasynda №69 jańa mektep bilim alýshylarǵa esigin aıqara ashty. Resmı derekke sensek, qazirgi kezde munda 1310 bala bilim alyp jatyr.

Jańa úlgide salynǵan bilim uıasynda 97 kabınet bar. Sonymen qatar 3 sheberha­na, 4 kompıýterlik synyp, 6 zerthana, horeografııalyq zal, kovorkıng ortalyq­tar, 4 sport zal bar. Jańa mektep jalpy sany 2000 oqýshyǵa arnalyp salynǵan eken. Derekke sensek, munda oqýshylardyń shyǵarmashylyq áleýetin arttyrý úshin zamanaýı robottehnıka jáne STEM zerthana­lary qarastyrylǵan. Sondaı-aq bilim oshaǵy tolyqqandy beı­nebaqylaý júıe­simen qamtylǵan. Sonymen qatar erekshe qajettiligi bar balalar úshin pandýs, lıft, sanıtarlyq toraptar jáne ınklıýzıvti bilim berý kabıneti qaras­tyrylǵan.

«Memleket basshysy Qasym-Jomart Toqaevtyń tikeleı tapsyrmasy aıasynda qolǵa alynǵan «Keleshek mektep» ulttyq jobasy elimizdiń barlyq óńirinde sátimen júzege asyrylyp jatyr. О́tken jyly óńirde birneshe bilim ordasy «Keleshek mektep» ulttyq jobasy sheńberinde boı kóterdi. Osy jyly Taraz qalasyndaǵy «Shóldala» turǵyn alabynda jáne Qordaı aýdanynda jalpy sany 3 bilim berý nysany paıdalanýǵa berilmek. О́ńirde bilim berý salasynda atqarylatyn jumys az emes. Eń basty mindet – oqýshylardy sapaly bilimmen qamtý», deıdi óńir basshysy Erbol Qarashókeev.

Oblys ákimdiginiń baspasóz qyzmeti keltirgen resmı derekke júginsek, óńir bo­ıynsha «Keleshek mektepteri» ulttyq jobasy aıasynda 12 mektep salý josparlanǵan. Onyń ishinde birneshe mektep ótken jyldary paıdalanýǵa berilgen. Bul jumys osy jyly da úzdiksiz júrgizilmek. Nátıjesinde, úsh aýysymdaǵy jáne apatty jaǵdaıdaǵy mektepterdiń máselesi tolyǵymen sheshimin tabady.

Jambyl oblysy