Is-sharaǵa Qytaı, Taıland, Laos, Vetnam jáne Qazaqstan elderiniń 170-ten astam ókili qatysty. Mıssııanyń negizgi bóligi — qazaqstandyq azyq-túlik óndirýshiler men Qytaı jáne Ońtústik -Shyǵys Azııa memleketteriniń qaýymdastyǵyna múshe elderiniń kásipkerleri arasyndaǵy ekijaqty B2B-kezdesýler boldy. Bul kezdesýler barysynda 28 qazaqstandyq kompanııa óz ónimderin sheteldik seriktesterge usyndy.
«Biz Chýnsın qalasyn mańyzdy saýda seriktesi retinde kóremiz. Halqynyń sany 32 mıllıonnan asady, JIО́ $430 mıllıardtan joǵary, sıfrlyq ındýstrııasy, avtomobıl jasaý, elektronıka, hımııa jáne tamaq ónerkásibi damyǵan Qytaıdyń jetekshi óndiristik ortalyǵy bolyp tabylady. Sonymen qatar, bul qala alǵash ret Astanada tanystyrylǵan «Bir beldeý — bir jol» bastamasynyń negizgi toraptarynyń biri. Qazaqstan osy bastamany alǵashqy kúnnen bastap qoldap keledi jáne ony ilgeriletýge belsendi qatysýda», — dedi QR Saýda jáne ıntegrasııa mınıstri Arman Shaqqalıev.
Mınıstr sondaı-aq Chýnsın arqyly Eýropaǵa baǵyttalǵan basty temirjol marshrýttarynyń (Chýnsın–Dýısbýrg, Chýnsın–Máskeý) ótetinin jáne olardyń 80%-dan astamy Qazaqstan arqyly tranzıtpen júretinin aıtyp, birlesken logıstıkalyq hab qurýdyń zor áleýetine nazar aýdardy.
«Biz Chýnsın kompanııalaryn Qazaqstanda birlesken óndiris oryndaryn, logıstıkalyq ortalyqtar men qaıta óńdeý kásiporyndaryn qurýǵa shaqyramyz. Bul óndiristerden ónimder Eýropaǵa, Reseıge, Iranǵa jáne Taıaý Shyǵys elderine eksporttalady. Búgin bizdiń bıznes-delegasııa quramynda Chýnsın naryǵyna shyǵýǵa daıyn ondaǵan qazaqstandyq eksporttaýshylar bar», — dep atap ótti mınıstr.
Mıssııa aıasynda qazaqstandyq kásipkerler Chýnsın qalasynyń iri kásiporyndary men ekonomıkalyq alańdaryn aralady. Olardyń qatarynda Chongqing Zhou Junji Hot Pot Food Co., Ltd., Chongqing Foreign Trade and Economic Cooperation Group (CFTEC), Quality Chinese Product Trade Center (QCPTC) jáne Chongqing Bonded Port Area Group bar. Bul saparlar Qytaı naryǵyna tabysty shyǵý úshin qajetti saqtaý, dıstrıbýsııa, logıstıka jáne taýarlardy sertıfıkattaý múmkindikterimen tanysýǵa jol ashty.
Mıssııa barysynda eki mańyzdy kelisimge qol qoıyldy. «QazTrade» pen Chýnsın qalasyndaǵy halyqaralyq saýdany damytý komıteti arasyndaǵy jáne «QazTrade» pen Chýnsındegi úlken logıstıkalyq ortalyqtyń basqarýshy kompanııasy arasyndaǵy kelisimderge qol jetkizildi. Bul kelisimder Qazaqstan men Qytaı arasyndaǵy saýdany damytýǵa kómektesedi jáne qazaqstandyq ónimderdiń Qytaıdyń ońtústik-batysyndaǵy iri qoıma jáne jetkizý ortalyqtaryna shyǵýyna múmkindik beredi.
Chýnsındegi saýda-ekonomıkalyq mıssııa Qazaqstan men Shyǵys jáne Ońtústik-Shyǵys Azııa elderi arasyndaǵy saýda qatynastaryn nyǵaıtýdyń mańyzdy qadamyna aınalyp, qazaqstandyq óndirýshiler úshin halyqaralyq naryqtarda jańa múmkindikterge jol ashty.
