foto: ashyq derekkóz
Sessııa otyrysyna tóraǵalyq etken oblys ákimi Qumar Aqsaqalov aımaqta 50-den astam etnos ókili beıbit ómir súrip jatqanyn, olardyń árqaısy óńirdiń damýyna ózindik úles qosyp otyrǵanyn atap ótti.
Mysaly, óńirdegi Assambleıa músheleri osy jyldyń ózinde elýge jýyq qaıyrymdylyq aksııasyn ótkizip, oǵan 2 mln teńgeden astam qarjy jumsaǵan. Bilim men mádenıet, sport salasynda atqarylyp jatqan ıgi jobalar da qısapsyz.
О́ńirde ózge ult ókilderiniń qazaq tilin úırenýine qolaıly orta qalyptastyrýǵa baǵyttalǵan birqatar tildik bastamalar da sátimen júzege asyrylyp keledi. Mysaly, «Mámile: sıtýatıvti qazaq tili» klýby bes jyldan beri turǵyndarǵa aýyzeki sóıleý tilin úıretýmen aınalysady. Keńeske qatysýshylarǵa atalǵan klýbtyń jumysy jóninde qazaq tiliniń mamany Dmıtrıı Romashenko aıtyp berdi.
«Biz qazaq tilin úırenýge yqylas-nıet qoıǵan kez kelgen adamǵa kómektesýge daıynbyz. Búginde offlaın klýbta ártúrli jastaǵy, ulty ár alýan 42 tyńdaýshy til úırenip jatyr. «Mámile» kýrsynyń mazmuny tyńdaýshylardyń suranysy boıynsha jasalady. Biz zamanaýı ádistemelerdi, oıyn elementterin, aýdıo jáne beınematerıaldardy qoldana otyryp, oqytý úderisin qyzyqty ári tıimdi etýge tyrysamyz», deıdi D.Romashenko.
Qazaq tiliniń mamany til úıretý sabaqtaryn óziniń jeke Tik-Tok akkaýntynda tikeleı efırde ótkizedi. Dmıtrııdiń aıtýynsha, bir sabaq barysynda efırdi orta eseppen júz otyz kórermen kóredi eken.
Sessııa otyrysynyń sońynda oblys ákimi Qumar Aqsaqalov jergilikti etno-mádenı birlestikterdiń belsendi múshelerine «Qazaqstan halqy Assambleıasyna 30 jyl» mereıtoılyq medalin tabys etti.
