Salanatty is-sharaǵa «Jasyl el» jastar eńbek jasaqtarynyń respýblıkalyq, oblystyq shtab basshylary, ár aýdannyń Jastar ortalyǵy basshylary men eriktiler qatysty.
– «Jasyl el» jasaqtarynyń respýblıkalyq deńgeıdegi ashylý saltanaty 22-23 mamyr kúnderi Aqtóbe qalasynda ótti. Oblystyq maýsymnyń ashylýyn Kúrshim aýdanynda ótkizip jatyrmyz. Bıyl respýblıka boıynsha 30 myńǵa jýyq jas maýsymdyq jumyspen qamtylady. Jumys nátıjesin berip, qatysýshylar sany jyldan-jylǵa artyp kele jatqany qýantady, – dedi «Jasyl el» jastar eńbek jasaqtarynyń respýblıkalyq shtab basshysy Nurasyl Bekmatov.
Bıyl uıymnyń jasaqtalǵanyna 20 jyl boldy. Osyǵan oraı el kóleminde túrli sharalar, ekologııalyq naýqandar, chellendjder josparlanǵan. Jeńimpazdar respýblıkalyq deńgeıde ótetin jabylý saltanatynda marapattalmaq.
Osy jıyrma jylda oblystyq «Jasyl el» shtaby eleýli eńbek atqaryp, 14-35 jas aralyǵyndaǵy jumyssyz jastar men stýdentterdi jazǵy maýsymda eńbekpen qamtyp keledi.
– Bıyl Shyǵys Qazaqstan boıynsha myńǵa jýyq jas jumyspen qamtylady. Olar ózderi turatyn jerdiń kógaldandyrý, abattandyrý jumystaryna belsene aralasyp, 120 myń teńge jalaqy alady. Sondaı-aq túrli aksııa uıymdastyrylyp, maýsym sońynda 10 atalym boıynsha úzdikter marapattalady. Qazir ár qala men aýdan boıynsha 13 jumys berýshimen kelisim jasaldy, jastardy jumysqa ornalastyrýǵa daıyn, – dedi «Jasyl el» oblystyq fılıalynyń dırektory Maqsat Káribaev.
Is-shara sońynda jıynǵa qatysýshylar ortalyq saıabaqta kóshet egip, úlken kópirdiń mańynda tazalyq jumystaryn júrgizdi.
Shyǵys Qazaqstan oblysy
