Araldaǵy shegirtke sherýi

Merdiger mekeme ókilderi de ádette araǵa ýaqyt salyp jandana bastaıtyn zııankes túr­leriniń bir mezgilde «oıanyp» alǵanynan qaýip kútetinin ja­syrmaǵan. Apta aınalmaı jatyp aıtqandary aınymaı keldi. Aral aýdanyndaǵy Qaraqum aýylyndaǵy shegirtke sherýi áleý­mettik jelini kezip ketti. Beı­nejazbadaǵy kadrlardan zııan­kestiń biraz aýmaqty jaılap alǵany anyq baıqalyp tur.

Oqıǵaǵa baılanysty alǵash­qy bolyp oblystyq aýyl sha­rýashylyǵy jáne jer qaty­nas­tary basqarmasy habar taratty. Basqarmanyń málimetinshe, Qaraqum aýyldyq okrýgindegi Kókasha eldi mekeninde zııankester turǵyn úıler aýlasyn emin-erkin jaılap alǵan. Bar-joǵy 4 úıden turatyn eldi meken tolyq baqylanyp, qajetti sharalar qolǵa alynǵan. Qalǵan aýyldyq okrýg ortalyqtaryn­da zııankesterdiń dál munsha erkinsýi baıqalǵan joq.

Basqarma dereginshe, aýdan aýmaǵynda shegirtkeler sáýir aıy­nyń sońynda biline bas­­­­tap­ty. Áýelgide Qaraqum aýyl­­­dyq okrýgine qarasty Aı­dar­­­ly shoqalaq, Izbanqumy, Tórt­­­q­ara óńirlerinde, son­daı-aq Saz­dy aýyldyq okrýgin­degi Beı­­­sembaı qumy, Tazsha­tóbe, Eskene óńirlerinde ıta­lııa­lyq prýs dernásilderi kózge tús­ken eken. Sál keıin Aq­qum okrý­gindegi Teńizbaı qumy men Aıt­jantabannan, 15 ma­myrda Qosaman men Jińish­kequm aýyl­dyq okrýgterinen de zııankes­ter belsendiligi baıqalǵan. Osy­ǵan baılanysty kóktemgi-jaz­ǵy maýsymǵa ar­nalǵan monı­to­rıng jumystary shuǵyl bas­talyp, qazir 145,6 myń gektarǵa jos­parlanǵan aýmaqtyń 5,7 myń gektary zertteldi. Naq­ty óń­deý aýmaqtary belgilenip, teh­nıkalar jetkizildi. Aqqum, Qara­qum, Jińishkequm, Qosaman aýyl­dyq okrýgterine 5 jer ­agre­gaty, Qaraqumda 2 asa jeńil ushaq, Sazdyda 3 dron kóme­gi­men hımııalyq óńdeý sharalary júrgizilip jatyr. Osy kú­nge deıin 7 742 gektar aýmaqta hımııa­lyq óńdeý jumystary jasaldy.

Mamyrdyń 24-nen bastap ­mer­diger tarapynan taǵy 1 ­«AN-2» áýe kóligi qosylyp, kúrdeli re­lefti óńirlerdi ýlaýǵa kirisip ketti. Budan bólek, Shıjaǵada 2 jer agregaty men 5 RANS apparaty, Toqabaıda 1 jer agregaty men 2 dron, Qosamanda 1 jer agregaty men 1 RANS, Qara­qum­da 7 jer agregaty, 2 deltaplan, 23 RANS apparaty bar. 

Jolyndaǵysyn jaıpap óte­tin zııankester Aralqum, Sapaq, Jińishkequm, Bekbaýyl aýyldyq okrýgterine qarasty sharýa qojalyqtary aýmaǵy men memlekettik jer qorlary­na da zalal keltirip úlgeripti. Osyǵan baılanysty Sapaq aýyl­dyq okrýginiń Kóktem eldi mekenindegi sharýa qojalyǵy­nyń 157 gektar jeri arnaıy tehnıkamen óńdeldi.

Jalpy, oblys boıynsha byl­tyrǵy jaz ben kúzdegi zertteý ju­mystarynyń nátıjesin­de bıyl 115,4 myń gektarǵa fı­to­sa­nıtarlyq sharalar júrgizý jos­­­parlanǵan. Onyń ishinde ıta­lııa­lyq prýsqa qarsy 24,7 myń ga, azııalyq shegirtkeniń taralýyn boldyrmaý úshin 35,3 myń ga, saıaq shegirtkeniń jolyn kesý úshin 55,4 myń ga óńdelýi kerek. Qazir ıtalııalyq prýs dernásilderi alǵash baıqalǵan Aral aýdanynda josparlanǵan 513,9 myń ga aýmaqtyń 164,8 myń gektary zertteldi. Onyń ishinde ekonomıkalyq zııandy sheginen asqan 14,7 myń gektardyń  jartysynan astamy óńdeldi.

Oblystyń ońtústik óńir­le­rinde saıaq shegirtkege qarsy hı­mııalyq óńdeý jumystary bas­talyp ketti. Tıisti sala ókilderi óńdeý jumystarynyń bary­­syn jiti qadaǵalap otyr. Aýdan, aýyl ákimdikterine merdiger kom­­­panııa­lar jumysyna jaǵdaı jasap, jan-jaqty kómek kórsetý  tap­syryldy.

QYZYLORDA