Osy mereıli dataǵa oraı Astana Halyqaralyq ýnıversıtetiniń (AIU) uıymdastyrýymen halyqaralyq ǵylymı-tájirıbelik konferensııa ótti. Elimizdiń qylmystyq jáne ákimshilik zańnama salasyndaǵy negizgi máseleler men jetistikter talqylanǵan is-sharaǵa memlekettik organdardyń, ǵylymı jáne quqyq qorǵaý qoǵamdastyqtarynyń ókilderi, sondaı-aq Reseı Federasııasynan kelgen qonaqtar qatysty.
Jıyndy ashyp, júrgizgen ýnıversıtet prezıdenti, professor Serik Irsalıev konferensııany ótkizýge sebep bolyp otyrǵan tórt kodeks elimizdiń qazirgi quqyqtyq júıesi men qylmystyq is júrgizý saıasatyn qalyptastyrýda mańyzdy ról atqarǵanyn tilge tıek etti. Onyń aıtýynsha, Prezıdent Qasym-Jomart Toqaevtyń bastamasymen júzege asyp jatqan «Zań men tártip» qaǵıdatynyń basty tiregi – eń aldymen zań ústemdiginiń qamtamasyz etilýi. Osy oraıda quqyq salasyn retteıtin kodeksterdiń alar orny erekshe.
Konferensııa barysynda Konstıtýsııalyq sottyń tóraǵasy Elvıra Ázimova, Ortalyq saılaý komıssııasynyń tóraǵasy Nurlan Ábdirov, Senattaǵy Konstıtýsııalyq zańnama, sot júıesi jáne quqyq qorǵaý organdary komıtetiniń tóraǵasy Evgenıı Bolgert, Prezıdent janyndaǵy Adam quqyqtary jónindegi komıssııanyń tóraǵasy Igor Rogov, Ádilet vıse-mınıstri Laýra Mersalımova, Bas prokýratýranyń zańdy kúshine engen úkimderdiń zańdylyǵyn jáne olardyń oryndalýyn qadaǵalaý qyzmetiniń basshysy Murat Ahmetov, E.Bóketov atyndaǵy Qaraǵandy ýnıversıtetiniń rektory Nurlan Dýlatbekov jáne basqa da memleket, ǵylym jáne bilim berý salasynyń kórnekti ókilderi sóz sóıledi.
Atap aıtqanda, konferensııaǵa qatysýshylar keıingi 10 jyldaǵy qylmystyq jáne ákimshilik-quqyqtyq normalardy qoldaný tájirıbesin taldap, aspektilerdi anyqtaý men olardy reformalaý boıynsha usynystardy talqylady. Quqyq qorǵaý qyzmetiniń tıimdiligi, qylmystyq atqarý júıesin jańǵyrtý, otandyq zańnama men halyqaralyq standarttar arasyndaǵy baılanys, jańa jaǵdaılardaǵy ákimshilik jaýapkershilik, zańnamany jetildirý maqsatynda zań ǵylymy men tájirıbeniń ózara árekettesýi syndy ózekti máseleler áńgime arqaýyna aınaldy.
Kirispe bólimnen keıin elimizdiń eńbek sińirgen qaıratkeri, zań ǵylymdarynyń doktory, professor Isıdor Borchashvılıdiń eki jańa monografııasynyń tusaýy kesildi. «Is-árekettiń qylmystylyǵyn joıatyn mán-jaılar» jáne «Otbasyna jáne kámeletke tolmaǵandarǵa qarsy qylmystyq quqyq buzýshylyqtar: quqyq, teorııa jáne praktıka» dep atalatyn bul jańa eńbekterdi mamandar elimizdiń quqyq qoldaný salasyna qosylǵan tyń dúnıe dep baǵasyn berdi. Jıyn barysynda pikir bildirgen áriptesteriniń biri, Astana halyqaralyq ýnıversıteti Quqyq joǵary mektebi dekanynyń orynbasary Janat Seıilhanov bul monografııalar quqyq qoldaný jáne quqyq qorǵaý organdarynyń qyzmetkerleri úshin jolsilteýshi ǵylymı týyndy ekenin aıtty.
– «Is-árekettiń qylmystylyǵyn joıatyn mán-jaılar» dep atalatyn birinshi monografııa Qylmystyq kodekstiń Jalpy bólimi boıynsha jazylǵan. Bul taqyryp – Qylmystyq kodekstegi jeke bir aýqymdy ınstıtýttyń biri. Al ekinshi monografııasy Qylmystyq kodekstiń Erekshe bóliminiń ekinshi taraýy boıynsha daıyndalǵan. Bul jerde otbasyna jáne kámeletke tolmaǵandarǵa qarsy qylmystyq quqyq buzýshylyqtar týraly teorııalyq jáne tájirıbelik erekshelikteri berilgen, – dedi ol.
Konferensııaǵa qatysqan Reseı Federasııasynyń zańger ǵalymdary óz elindegi qylmystyq jáne ákimshilik zańnamany reformalaý tájirıbesimen bólisip, eki eldiń quqyqtyq júıesiniń damýyndaǵy uqsas jáne ártúrli vektorlardy atap ótti.
Is-shara qorytyndysy boıynsha qatysýshylardyń sózderi men baıandamalary negizinde usynystar qabyldandy. Onyń túpkilikti nusqasy zań shyǵarý men quqyq qoldaný salasynda paıdalaný úshin memlekettik organdarǵa, ǵylymı ortalyqtarǵa jáne basqa da múddeli uıymdarǵa jiberilmek.
