Sýretterdi túsirgen – Igor BÝRGANDINOV
Qazaqstannyń asa mańyzdy halyqaralyq forýmǵa shaqyrǵanyna rızashylyǵyn bildirgen Italııa Premer-mınıstri Ortalyq Azııa-Italııa seriktestigi jóninde aıtty. Sondaı-aq bizdiń eldiń úkimetimen aradaǵy strategııalyq yntymaqtastyqtyń mán-mańyzyna toqtaldy.
«Búgin meniń Italııa Respýblıkasy Mınıstrler Keńesiniń tóraǵasy retindegi Qazaqstanǵa alǵashqy resmı saparym bastalady. Men muny hattamalyq sapar ǵana dep eseptemeımin. Biz osy sapardy Qazaqstan Úkimetimen aradaǵy strategııalyq yntymaqtastyqty qarjylandyrý turǵysynan, qalyptasyp jatqan baılanystardy nyǵaıtý turǵysynan bekitkimiz keledi», dedi Italııa Úkimetiniń basshysy.
Sonymen qatar mártebeli qonaq Ortalyq Azııa – Italııa seriktestiginiń negizgi sektorlaryn atady. Sóıtip, energetıka, tehnologııa, sırek shıkizat qory týraly da oıyn bildirdi.
«Sizder Azııadan Eýropaǵa deıin, Jerorta teńizinen Tynyq muhıt aımaǵyna deıin tutastyq turǵysynan kóz salasyzdar. Eger osy forýmǵa uran etip alynǵan keleshekti qalyptastyrǵymyz kelse, batyldyq tanytyp, geografııalyq shekaradan shyǵyp, jańa jolǵa túsýimiz kerek», dedi ol.
Oǵan qosa Djordja Melonı Italııanyń aımaqtaǵy yqpaldastyq baılanysyna negiz bolyp otyrǵan salalardy atap kórsetti.
«Biz muny ózara qarym-qatynasymyzdy bekem etetin, bárimizdi biriktirip úlgergen baǵyttardan bastadyq. Men bul jerde yntymaqtastyqtyń dástúrli segmentine aınalǵan energetıka sektoryn aıtyp otyrmyn. Tehnologııadaǵy beıtaraptylyq qaǵıdatynsyz ornyqty ekonomıkanyń qaýipsizdigin qamtamasyz ete almaımyz. Men sondaı-aq asa mańyzdy sırek shıkizattardy negizge alyp otyrmyn. Bul saladaǵy yntymaqtastyǵymyz ortaq tabys pen ózara múmkindikterge baǵyttalǵan», dedi Italııanyń Premer-mınıstri.
Ol Ortalyq Azııany Eýropa men Azııa arasyndaǵy baılanys beketi dep esepteıtinin de málimdedi.
«Qazirgi ahýaldy baǵamdap otyrmyn jáne bul aımaq árdaıym Shyǵys pen Batys arasyndaǵy jolaıryq bolyp kelgenin, jahandyq ssenarııde onyń strategııalyq mańyzy artyp kele jatqanyn kórip otyrmyn. Qazirgideı aýyr kezeńde Ortalyq Azııa árdaıym jer shary ǵasyrlar boıy bastan ótkerip kele jatqan transformasııa men ózgeris ortalyqtarynyń arasynda kópir bolyp turdy. Bul aımaq – eki qurlyq arasyndaǵy kópir, Eýropa men Azııa arasyndaǵy baılanys beketi jáne qaqtyǵystar arasyndaǵy baılanys aılaǵy», dedi.
Djordja Melonı Ortalyq Azııadaǵy kúrdeli ekologııalyq máselelerge de toqtaldy.
«Ekologııalyq syn-qaterler oıymda. О́ıtkeni qazir Araldy qutqarý máselesine, Aral murasyna degen kúsh-jigerimizdi jańartyp jatyrmyz. Bul – bizdiń paryzymyz jáne ony qorǵaý bizdiń mindetimiz. Italııanyń Klımattyq qoryn osyndaı jobalardy júzege asyrýda paıdalanýǵa bolady», dedi.
