Foto: ashyq derekkóz
Bes kúndik jumys kestesimen eńbek etetin qazaqstandyqtar 6-8 maýsym aralyǵynda uzaq demalysqa shyǵady.
Qurban aıt merekesi 2025 jyly 6, 7 jáne 8 maýsym kúnderi atap ótiledi. Bul aqparatty buǵan deıin Qazaqstan musylmandary dinı basqarmasynyń (QMDB) Sharıǵat jáne pátýa bólimi rastaǵan bolatyn.
Bes kúndik jumys aptasy úshin:
- 6 maýsym (juma) – demalys;
- 7 maýsym (senbi) – demalys;
- 8 maýsym (jeksenbi) – demalys.
Alty kúndik jumys aptasy úshin:
- 6 maýsym (juma) – demalys;
- 7 maýsym (senbi) – jumys kúni;
- 8 maýsym (jeksenbi) – demalys.
Qurban aıt degenimiz ne?
Qurban aıt – musylmandardyń mańyzdy merekeleriniń biri. Ol qasıetti Ramazan aıynan 70 kún ótken soń atap ótiledi. Bul meıram – qurbandyq shalý, meıirimdilik tanytý, muqtaj jandarǵa kómektesý sııaqty izgi amaldardy qamtıdy.
Mereke kúni:
- meshitterde aıt namazy oqylady;
- qurbandyqqa mal shalynady (qoshqar, sıyr nemese túıe);
- qurbandyq eti otbasy, kórshiler jáne muqtaj jandar arasynda bólinedi.
Qurban aıt merekesin demalys kúni retinde belgileý týraly sheshimdi Qazaqstannyń Eńbek jáne halyqty áleýmettik qorǵaý mınıstrligi QMDB usynǵan kúntizbege sáıkes qabyldaıdy.
Maýsymda neshe kún demalys bolady?
Bes kúndik jumys aptasynda:
Qazaqstandyqtar maýsym aıynda 10 kún demalyp, 20 kún jumys isteıdi.
Alty kúndik jumys aptasynda:
6 kún demalys, 24 jumys kúni bolady.
Maýsym aıyndaǵy kásibı merekeler
Maýsym – túrli sala mamandary úshin kásibı merekelerge toly aı. Olardyń kópshiligi resmı demalys kúni bolmasa da, atap ótiledi:
- 5 maýsym – Ekologtar kúni
- 7 maýsym – Monopolııaǵa qarsy organ qyzmetkerleriniń kúni
- 9 maýsym – Áskerı qyzmetshiler men arnaıy bólimsheler kúni
- 23 maýsym – Polısııa jáne memlekettik qyzmetshiler kúni
- 24 maýsym – Sýdıalar men sot qyzmetkerleri kúni
- Maýsymnyń ekinshi jeksenbisi – Jeńil ónerkásip jáne mal sharýashylyǵy qyzmetkerleri kúni
- Maýsymnyń úshinshi jeksenbisi – Medısına qyzmetkerleriniń kúni
- 28 maýsym – Buqaralyq aqparat quraldary qyzmetkerleriniń kúni
2024 jylǵy qarashada Eńbek jáne halyqty áleýmettik qorǵaý mınıstri Svetlana Jaqypova 2025 jylǵa arnalǵan demalys kúnderin aýystyrý týraly buıryqqa qol qoıǵan bolatyn. Qujatqa sáıkes, 5 qańtardaǵy (jeksenbi) demalys kúni 3 qańtarǵa (juma) aýystyryldy. Budan basqa, 2025 jyly demalys kúnderin aýystyrý josparlanbaıdy.
Sondaı-aq, mınıstrlik 2025 jyldyń naýryzynda demalys kúnderin basqa jumys kúnderine aýystyrý ár jaǵdaıǵa baılanysty jeke qarastyrylatynyn atap ótti.
Eske salaıyq, ótken jyly qazaqstandyqtar Qurban aıt merekesi jeksenbige túsip, bir kúnge az demalatynyna narazy bolǵan edi. QMDB 2024 jylǵy Qurban aıtty 16 maýsym, jeksenbige belgilegen bolatyn.
Jaqynda Májilis depýtaty Kenjeǵul Seıtjan 1 maýsym – Balalardy qorǵaý kúnin resmı memlekettik mereke retinde bekitýdi usyndy. Sonymen qatar, ol demalys kúnderin aýystyrý tártibin jetildirýdi jáne aldaǵy eki jylǵa demalys kestesin aldyn ala bekitýdi usyndy.
Janel TО́LEÝBEKOVA, EUÝ stýdenti
