Kezdesýde Oljas Bektenov Qazaqstan Úkimeti joǵary deńgeıde qol jetkizilgen kelisimderdi tolyq iske asyrýǵa nıetti ekenin aıtty. Taraptar saýda-ekonomıkalyq, ınvestısııalyq jáne kólik-logıstıkalyq salalardaǵy yntymaqtastyqqa aıryqsha nazar aýdardy. Atap aıtqanda, otandyq organıkalyq aýyl sharýashylyǵy ónimderiniń ózara saýdasyn keńeıtý men ony qaıta óńdeý jáne eksporttaý, hımııa, qosylǵan quny joǵary taýarlar boıynsha birlesken kásiporyndar qurý múmkindikteri qaraldy.
Yntymaqtastyqty odan ári arttyrýdyń negizgi platformalarynyń biri retinde Transkaspıı halyqaralyq kólik baǵyty – «Orta dálizdi» damytý máselesi alǵa shyqty. Sonymen qatar eki eldiń bıznes-toptarynyń aqparattyq tehnologııalar, farmasevtıka, týrızm, sondaı-aq jalpy tájirıbe almasý salasyndaǵy ınvestısııalyq ózara is-qımylyn ilgeriletý perspektıvalary talqylandy.
Bolgarııa Qazaqstannyń Eýropalyq odaqtaǵy eń iri 15 saýda seriktesiniń qataryna kiredi. О́tken jyly ekijaqty taýar aınalymy 375 mln dollarǵa deıin artty. Qazirgi ýaqytta jańa jumys oryndaryn ashý arqyly jalpy quny 117 mln dollardan asatyn birlesken jobalar pysyqtalyp jatyr.
