Osy rette aqynnyń Katonqaraǵaıǵa saparlap qaıtýynyń da oraıy kelip tur. «Igi istiń basyna, jaqsy keler qasyna» demekshi, dál osy kúnderi Katonqaraǵaıda «Altaı – túrki áleminiń altyn besigi» atty halyqaralyq shara uıymdastyrylyp jatyr. Aıtýly shara aıasynda Shyǵystan shyqqan qos jazýshy Qalıhan Ysqaq pen Dıdahmet Áshimhannyń mereıtoılary atap ótiledi. Sol toıǵa oblystyq mádenıet basqarmasy ókilderi Iran-Ǵaıyp Orazbaevty qonaq etip alyp barmaqshy. Sál erterekte Qalıhan Ysqaq Iran-Ǵaıyp inisine «Asqar Súleımenov ekeýińdi Katonǵa alyp baramyn» dep júripti. Sol boıy jol túspegen.
– «Sizge arman bolǵan Altaıǵa aparaıyq» dep jatyr jigitter. О́ıtkeni, О́skemenniń irgesinde Beloýsovka kentinde praktıkada júrip, Katonqaraǵaıdy kóre almaı ketkem. Sodan beri neshe jyl ótti, Altaı arman bolyp qalǵan. Men «Qazaq ádebıeti» gazetinde Dıdashpen, Dıdahmet Áshimhanmen jeti jyl birge qyzmet ettim. Keremet jýrnalıst boldy. Al Qalıhan Ysqaq pen Asqar Súleımen Almatyǵa alǵash qonys aýdarǵanymda meni poıyzdan kútip alyp, bir keıýananyń úıine ornalastyrǵan. Maǵan Juban Moldaǵalıev úı alyp bergenshe Qalıhan meni «Qara tentek» deıtin. Aralasyp kettik. Katonǵa neshe shaqyrdy. Dám tartpady. Endi qudaıdyń qulaǵyna tıdi me, osydan elý jyl buryn jazǵan «Altyn ajal» degen dastanym sahnalanady. Sonyń daıyndyǵyn kóreıin dep keldim. Sóıte júrip, arman bolǵan Altaıǵa baryp qaıtpaqpyn, – deıdi aqyn Iran-Ǵaıyp Orazbaev.
Minekı, Iran-Ǵaıyp aqyn Katonqaraǵaı aýdanyna da baryp, kózi tirisinde jezde dep qurmettegen Qalıhan Ysqaq pen áriptes inisi Dıdahmet Áshimhanulynyń rýhyna taǵzym etedi.
Shyǵys Qazaqstan oblysy
