Bıyl lagerlerge aǵymdyq jóndeý men árleý jumystaryn júrgizýge 393 mln teńge bólingen. Sonyń ishinde 368 mln teńge 5 lagerdi jóndeý men jabdyqtaýǵa bólindi. Dálirek aıtqanda, Aqqaıyń aýdanyndaǵy «Oqjetpes» lagerine – 4 mln, M.Jumabaev aýdanyndaǵy «Berezka» lagerine – 81,2 mln, Jambyl aýdanyndaǵy «Lesnaıa polıana lagerine – 86,8 mln, Ǵ.Músirepov aýdanyndaǵy «Aqqaıyń» lagerine – 3 mln teńge bólindi. Eń úlken qarajat – 192,8 mln teńge – Esil aýdanyndaǵy «Rodnık» balalar lagerine bólindi.
Budan basqa, 5 balalar lagerin senimdi basqarýshylar alǵan. Olar ózderi belgilegen aqyly negizde jetkinshekterge qyzmet kórsetedi. Bulardyń demalys jaǵdaıy, kóńil kóterý baǵdarlamalary, tamaqtanýy bıýdjetten qarjylandyratyndarǵa qaraǵanda joǵary ekenin aıta ketý kerek. Bul lagerlerge de bıyl jóndeý jumystaryna 25 mln teńge bólingen. Sonyń 15 mln teńgesi Taıynsha aýdanyndaǵy «Edelveıs-Býrabaı» lagerine aýdarylǵan. Al Petropavl qalasynyń aýmaǵynda ornalasqan «Dostyq» jáne «Aqqaıyń» lagerlerin jóndeýge 10 mln teńgeden qarjy bólingen.
Osy 6 maýsymda óńirdegi demalys jáne saýyqtyrý lagerleri ashyldy. Jumysyn bastaǵan lagerlerdiń bári SES qorytyndysyn alǵan. Qazir 6 200 (10%) oqýshy qala syrtyndaǵy lagerlerde demalyp jatyr.
Sonymen birge 2 maýsymnan bastap mektep janyndaǵy 58 570 oqýshyny qamtyǵan demalys lageri uıymdastyryldy. Onda balalar tamaqtanatyn 424 alań jumys isteıdi.
Oblystyq bilim basqarmasynyń basshysy Aınagúl Suraǵanovanyń aıtýynsha, jazǵy kezeńde oqýshylar 4 baǵyt boıynsha jumyspen qamtylady. Onyń ishinde 8 414 oqýshy eńbekpen qamtylyp, kógaldandyrý jáne abattandyrý brıgadalary qatarynda jumys istemek. Al 15 965 bala sporttyq-týrızm, ólke óńirlerine saıahat, basqa da ekskýrsııalar, arheologııalyq ekspedısııalarǵa tartylady. Sonymen qatar 26 130 oqýshy shyǵarmashylyqpen aınalysyp, 30 saǵat qosymsha bilim alady. Olar aýla klýbtary qatarynda túrli úıirmelerge qatysady. Al 13 myńnan artyq óren zııatkerlik ónerlermen aınalysyp, kóshbasshylyq mektepterinde belsendilik kórsetedi.
Jýyrda oblys ákimi Ǵaýez Nurmuhambetov Aqqaıyń aýdanyndaǵy «Oqjetpes» lagerinde bolyp, jańa maýsymnyń ashylýyna qatysty. «Balalardyń jazǵy demalysty belsendi, mazmundy ári kóterińki kóńil-kúımen bastaǵanyna qýanyshtymyn», dep jazdy ol óziniń áleýmettik paraqshasynda.
Bul lagerde balalardyń qaýipsiz ári jaıly demalysy úshin barlyq jaǵdaı jasalǵan. Demalys úıleri tegis jóndelip, aýmaqtary abattandyryldy. Sonymen birge beıne baqylaýlar ornatylyp, sapaly tamaqtaný, medısınalyq qyzmet jáne ár taqyrypqa arnalǵan qyzyqty oıyn-saýyq baǵdarlamalary uıymdastyrylǵan.
Soltústik Qazaqstan oblysy
