Oqýshylarǵa arnalǵan ınternaty bar jańa bilim ordasy Jamansor aýylynda boı kóteredi. Qyzylqoǵa aýdanynda temirjol boıynda ornalasqan atalǵan eldi mekende mektep jasyndaǵy 200-ge jýyq bala bar. Munda bastaýysh synyptyń oqýshylary 60 orynǵa beıimdelgen ǵımaratta bilim alýǵa májbúr. Al beıimdelgen nysanda sport jáne májilis zaly joq.
Qazir bastaýysh synyptar men daıyndyq toptarynda 64 bala tirkelgen. Al joǵary synyptardyń oqýshylary Atyraý men Qulsary qalalaryndaǵy, Maqat jáne Muqyr stansalaryndaǵy mektep-ınternatta bilim alady.
Atyraý oblysy ákiminiń orynbasary Qaırat Nurtaevtyń aıtýynsha, qurylysy bastalǵan mektep-ınternat úshin eki nysan salynatyny qarastyrylǵan. Onyń biri – 80 oryndyq mektep, al ekinshisi – 30 orynǵa eseptelgen ınternat.
«Prezıdenttiń aıqyn ustanymy – qaıtarylǵan qarjyny el ıgiligine jumsaý. Memleketke qaıtarylǵan aktıvter qarjysynyń bir bóligi Jamansor aýylynda jańa mektep-ınternattyń qurylysyna jumsalady. Bul joba shalǵaı aýyldaǵy balalardyń sapaly bilim alýyna qolaıly jaǵdaıdyń kepili bolady», dedi Qaırat Nurtaev.
Oblystyq qurylys, sáýlet jáne qala qurylysy basqarmasynyń tapsyrysymen salynatyn bilim ordasy prokýratýranyń baqylaýyna alynyp otyr. Atyraý oblysynyń prokýrory Baýyrjan Jumahanovtyń pikirinshe, mektep-ınternattyń qurylysyn aldaǵy qarasha aıyna deıin aıaqtaý kózdelipti. Qurylystyń sapaly júrgizilýine jaýapty merdiger – «Jıenbaı» JShS. Al «Aspab Engineering Grup» JShS tehnıkalyq qadaǵalaýdy, «A&K Alı Company» JShS avtorlyq baqylaýdy júrgizedi.
Jamansor aýylynyń turǵyndary mektep-ınternat qurylysynyń bastalǵanyn qýanyshty jańalyq retinde qabyldap otyr. О́ıtkeni aýyl turǵyny Baǵdabaı Amanovtyń aıtýynsha, buryn balalardy ózge aýyldardaǵy mektep-ınternattarǵa tasymaldap kelgen. Ásirese qysqy mezgilde qıyndyq jıi týyndaıdy.
«Balalar ata-anasynyń janynda bilim alǵany jón ǵoı. Alaıda osy kezge deıin biz mundaı múmkindikke qol jetkize almadyq. Jamansorda joǵary synypqa arnalǵan bilim ordasy joq. Sol sebepten oqýshylardy kórshiles eldi mekenderdegi ınternattarǵa jiberetin edik. Balalarymyz ata-anasynan jyraqtaýdy qalamasa da amalsyzdan ketetin edi. Endi óz aýylymyzda zamanaýı mektep-ınternat ashylsa, aldymen balalarymyz qýanatyn boldy», deıdi Baǵdabaı Amanov.
Atyraý oblysy
