Qazaqstan – ınternet-kontentti oqshaýlaý boıynsha óńirdegi kóshbasshylardyń biri. Alaıda qazaqstandyq saıttardyń basym bóligi áli de reseılik serverlerde ornalastyrylady. Odan keıin Eýropa men AQSh tur. Internettiń turaqtylyǵy men qaýipsizdigin qamtamasyz etý úshin Qazaqstan tek ózi úshin ǵana emes, búkil óńir úshin de sıfrlyq táýelsizdikti jedeldetýi qajet.
Digital Business saıtynyń jazýynsha, elimizdiń halyqaralyq ınternet-trafıginiń 95%-y Reseı arqyly ótedi. Bul ásirese ósip kele jatqan kúrdeli geosaıası jaǵdaıda aımaqtyń barlyq sıfrlyq ınfraqurylymyn osal etýi múmkin.
«Eger qandaı da bir sebeptermen Reseı baılanysty shekteýge nemese óshirýge sheshim qabyldasa, Qazaqstan men onyń kórshileriniń tolyqqandy ınternetsiz qalý qaýpi bar. Sol sııaqty Qytaı, Iran nemese Aýǵanstan arqyly keletin balamaly baılanys joldary da qaýipsiz emes nemese ony senzýrasy joǵary memleketter baqylaıdy», dep eskertedi mamandar.
Halyqaralyq esepte sıfrlyq táýelsizdikti arttyrý joldary usynylǵan. Atap aıtqanda, shalǵaı aýdandar úshin tómen orbıtada spýtnıktik baılanysty damytý, Kaspıı teńizi arqyly sýasty kabelderin tóseý men deldaldarsyz Eýropaǵa shyǵý, mazmun men qyzmetter el ishinde jumys isteýi úshin jergilikti derekter ortalyqtary men ınternet-provaıderlerdi qoldaý, syrtqy trafıkke táýeldilikti azaıtý úshin ashyq ınternet-bırjalar qurý jóninde keńes berilgen.
