Foto: ashyq derekkóz
2025 jylǵy 30 maýsymnan bastap Reseı Federasııasy shetel azamattary úshin shekaradan ótýdiń jańa tártibin engizedi. Endi Qazaqstan azamattary da Reseıge kirý kezinde saýsaq izderin tapsyryp, sýretke túsip, mindetti bıometrııalyq sáıkestendirýden ótýi tıis.
Bul týraly Vietjet Qazaqstan avıakompanııasy (burynǵy Qazaq Air) jolaýshylaryna resmı túrde habarlady. Kompanııa shekaralyq baqylaýdan ótý kezinde kidirister bolýy múmkin ekenin eskertip, jolaýshylarǵa áýejaıǵa keminde úsh saǵat buryn kelýge keńes beredi.
– Bıometrııalyq derekterdi jınaý 30 maýsymnan bastap mindetti bolady;
– Sheteldikter ESIA júıesinde (memlekettik qyzmetter portaly) aldyn ala tirkelip, arnaıy mobıldi qosymshada saýalnama toltyrýy qajet;
– Saýalnama ushýǵa 72 saǵat qalǵanda jiberilýi tıis.
«Biz jolaýshylarymyzǵa barlyq rásimderden ótýge qosymsha ýaqyt qarastyrýdy usynamyz. Bul kútpegen kidirister men reıske keshigýdiń aldyn alady», dedi Vietjet Qazaqstan habarlamasynda.
Jańa talaptar Reseı Úkimetiniń 2024 jylǵy 7 qarashadaǵy qaýlysy negizinde engizilip otyr. Bıometrııalyq tirkeý – shetel azamattarynyń elge kirýin baqylaýdy kúsheıtý maqsatyndaǵy pılottyq jobanyń ekinshi kezeńi. Bul júıe qaýipsizdikti arttyrýdy jáne derekterdi avtomatty túrde tekserýdi kózdeıdi.
Sarapshylardyń pikirinshe, jańa júıe alǵashqy kezeńde pasporttyq baqylaý uzaqtyǵynyń artýyna, áýejaıdaǵy uzaq kútýler men kidiristerge ákelýi múmkin. Osyǵan baılanysty jeke jáne iskerlik saparlar kezinde aldyn ala daıyndalý qajet.
Jańa tártipke qatysty tolyq aqparat pen saýalnamany toltyrý nusqaýlyǵy Reseıdiń memlekettik qyzmetter portalynda jáne mobıldi qosymshada qoljetimdi.
Janel TО́LEÝBEKOVA, EUÝ stýdenti
