Baýyrjan Momyshulynyń kelini, jazýshy, qoǵam qaıratkeri Zeınep Ahmetova, «Ońtústik» óńirlik qolbasshylyǵynyń qolbasshysy general-maıor Talapker Ámireev, ardagerler men ofıserler, áskerı qyzmetshiler jáne «Halyq banki» AQ Almaty qalalyq fılalynyń ókilderi bas qosqan jıynda erlik pen eldikke taǵzym etilip, jaýyngerlerdiń esimi ulyqtaldy.
Taǵylymdy is-shara aıasynda dańqty qolbasshy Baýyrjan Momyshulynyń jáne ár jyldary qaza bolǵan Ulttyq ulan jaýyngerleriniń qurmetine monýment ashyldy. Eńseli monýment Baýyrjan Momyshulynyń 115 jyldyq mereıtoıyna oraı boı kóterdi. Rásimde qyzyl lentany «Ońtústik» óńirlik qolbasshylyǵynyń qolbasshysy general-maıor T.Ámireev pen batyrdyń kelini Z.Ahmetova qıyp, eskertkishke gúl shoqtaryn qoıdy. Artynsha jınalǵandar erlik pen eldiktiń sımvolyna aınalǵan batyrlardyń rýhyna taǵzym etip, bir mınýt únsizdikpen eske aldy.
Is-sharada alǵash bolyp sóz alǵan general-maıor T.Ámireev jaýyngerlerdiń esimi árdaıym qurmetpen atalatynyn, olardyń erligi jas sarbazdarǵa úlgi ekenin atap ótti.
«El úshin jan bergen erlerdiń rýhy – máńgilik shyraq» degen qanatty sóz bar. Osyǵan oraı soǵys jyldarynda beıbit ómir úshin soǵysqan ardagerlerdiń jáne áskerı boryshyn oryndaý kezinde qaza tapqan ulandyqtardyń esimderi búgingi eskertkishke oıyp jazylǵan. Kópke úlgi bolarlyq ónegeli is keleshek urpaqqa tarıh dep bilemin. О́ıtkeni búgingi eskertkishke jazylǵan asyl azamattardyń janqııarlyq erligi men esil eńbegi jas urpaq úshin ónege», dedi general-maıor.
Bólim aýmaǵynda oryn tepken eńseli eskertkishtiń qaq ortasynda Baýyrjan Momyshulynyń músini beınelenip, óziniń naqyl sózderi qashalyp jazylǵan. Oń qanatynda 1995 jyly Tájik-aýǵan shekarasyndaǵy bitimgerlik mıssııada qaza tapqan 17 jaýyngerdiń, sol qanatynda Aqtóbedegi teraktide jáne qańtar oqıǵasynda erlikpen kóz jumǵan áskerı qyzmetshilerdiń esimderi jazylǵan.
«Halyq «О́tkenin eskergen – óskendiktiń belgisi, ótkenin umytqan – óshkendiktiń belgisi» deıdi. Qudaıǵa shúkir, ósip-ónip joǵymyzdy taýyp jatyrmyz. Mine, búgin de – sol tarıhtyń bir aıtýly kúni. Bul – urpaq úshin, ósip jatqan qazaqtyń ulandary úshin kerek dúnıe», dedi qoǵam qaıratkeri Z.Ahmetova.
Bul memorıal – el qorǵaý jolynda qaza tapqan erlerdiń erligin urpaq jadynda máńgi qaldyrýǵa baǵyttalǵan taǵzym belgisi. Jobany júzege asyrýǵa «Halyq banki» AQ Almaty qalalyq fılaly demeýshilik kórsetti.
«Osyndaı mańyzdy oqıǵaǵa óz úlesimizdi qosqanymyzdy maqtanyshpen aıtqymyz keledi. Bul monýment – Ult qaharmany Baýyrjan Momyshuly men barsha batyrdyń erligine degen taǵzymnyń belgisi. Endi osy eskertkishtiń aldynda Ulttyq ulan sarbazdary rýhty boıyna sińirip, elge qyzmet etýge sert beretin bolady dep senemiz», dedi qarjy uıymynyń ókili Ergen Marat.
Is-shara barysynda birqatar qonaqtarǵa Baýyrjan Momyshuly atyndaǵy «Batyr shapaǵaty» medali men brıgada komandıriniń alǵys hattary tabystaldy. Marapat eń aldymen Z.Ahmetovaǵa berildi. Sonymen qatar erlik murasyn ulyqtaýǵa úles qosqan ardagerler men eskertkish jobasyna demeýshilik jasaǵan qarjy uıymynyń qyzmetkerleri de osy qurmetke ıe boldy.
