Jobaǵa sáıkes, qoldanystaǵy «Baýyrjan Momyshuly» stansııasynan «Qalqaman» stansııasyna deıingi aralyqtaǵy týnnelderdiń uzyndyǵy 1,98 shaqyrym. Búgingi tańda sol jaq baǵyttaǵy tonnel tolyq qazylyp bitken, al oń jaq baǵytta 887 metr jer qazylǵan.
«BCN group» dırektorlar keńesiniń tóraǵasy Aleksandr Belovıchtiń málimetinshe, týnnel qazý jumystarymen bir ýaqytta stansııanyń qurylysy da belsendi túrde júrgizilip jatyr. Qazirgi tańda jeldetý uńǵymasy salyndy, qazý jumystary aıaqtaldy, al beton quıý jumystary 28 paıyzǵa oryndaldy.
«Nysandy 2026 jyldyń qańtar aıyna deıin tolyq aıaqtaý úshin qurylys qarqynyn arttyrý qajet. Osy maqsatta arnaıy shtab qurylatyn bolady. Onyń quramyna qala ákiminiń sala boıynsha orynbasary, tıisti basqarma basshylary, merdiger uıym ókilderi, sondaı-aq tehnıkalyq jáne avtorlyq qadaǵalaý mamandary kiredi. Shtab otyrystarynda jumystardyń barysy apta saıyn talqylanyp, qatań baqylaýda bolady», - dedi Almaty ákimi.
Qurylys alańynda qala ákimine metro jelisin ári qaraı keńeıtý boıynsha atqarylyp jatqan jumystar týraly da baıandaldy.
Almaty qalasy ákiminiń orynbasary Asqar Ámrın «Qalqaman» stansııasynan «Barlyq» bazaryna deıingi aralyqta taǵy úsh beketti qamtıtyn jańa baǵyttyń jobalyq-smetalyq qujattamasy daıyndalǵanyn jetkizdi. Jobany qurylys bastalǵan sátten bastap úsh jyl ishinde júzege asyrý josparlanyp otyr.
Sonymen qatar «Jibek joly» stansııasynan halyqaralyq áýejaıǵa deıingi ekinshi jeliniń tehnıkalyq-ekonomıkalyq negizdemesi ázirlenýde. Al «Saıran» stansııasynan Alataý qalasyna deıingi úshinshi jeliniń TEN jobasyn ázirleýge baıqaý jarııalanǵan.
«Biz «Barlyqqa» deıingi jeli qurylysyn kútip otyrmaı, metronyń taǵy eki jelisiniń qurylysyn qatarynan bastaýdy qarastyrýymyz kerek. Iаǵnı, úsh jyl kútpeı, barlyq jeli boıynsha jumys qatar júrýi tıis. Jalpy, metro – Almaty qalasynyń kólik júıesiniń mańyzdy elementi. Ol qala turǵyndarynyń qozǵalysyn jeńildetip, kún saıyn qala joldarymen júretin kólik sanyn azaıtýǵa múmkindik beredi. Sondyqtan metropolıtendi damytýǵa erekshe nazar aýdarylatyn bolady», - dep atap ótti Darhan Satybaldy.
