Jańa kezeńge qadam basqan senimdi seriktestik

Osy kúni Prezıdent Qasym-Jomart Toqaev Qytaı Halyq Respýb­lıkasynyń Tóraǵasy Sı Szınpındi Aqorda rezıdensııasynda qarsy alyp, kelissóz júrgizdi. Memleket basshysynyń aıtýynsha, QHR Tóraǵasy qazaq jerinde qaı kezde de qadirli qonaq sanalǵan, al onyń bul jolǵy sapary – shynaıy ári myzǵymas dostyǵymyzdyń aıqyn kórinisi.

– Qytaı Halyq Respýblıka­sy – Qazaqstannyń tatý kórshisi, jaqyn dosy jáne senimdi seriktesi. San qyrly qazaq-qytaı yqpaldastyǵy Sizdiń jeke qoldaýyńyzben máńgi ári jan-jaqty strategııalyq áriptestik rýhynda jáne buryn-sońdy bolmaǵan qarqynmen damyp kele jatyr. Muny erekshe yqylaspen atap ótkim keledi. Ortaq tarıhymyzǵa muqııat úńilsek, elderimizdiń arasynda eshqandaı túıtkilder nemese tosqaýyldar bolmaǵan. Tek qana ózara dostyq pen yqpaldastyq, túsinistik pen jyly lebizder basym boldy. Qytaı halqy qazaq halqyna eshqandaı zııan keltirgen joq, – dedi Qazaqstan Prezıdenti.

Memleket basshysy ekijaq­ty qarym-qatynas jyldan-jylǵa nyǵaıyp, jańa «altyn kezeńge» qadam basqanyn málimdedi. Dostyq baılanys eki el­diń turaq­ty áleýmettik-ekono­­mıkalyq damýyna jáne halyq­tardyń ál-aýqatyn jaqsartýǵa zor septigin tıgizip jatqanyna nazar aýdardy.

Qasym-Jomart Toqaev QHR Tóraǵasynyń elimizge sapary onyń týǵan kúnimen tuspa-tus kelip otyrǵanyna erekshe mán berip, Sı Szınpınge zor densaýlyq, baq-bereke, jaýapty memlekettik qyzmetine tolaıym tabys tiledi.

– Sizdi Qazaqstanda asa kórnekti memleket qaıratkeri, halyqaralyq qoǵamdastyq aldynda zor abyroı-bedelge ıe kóre­gen kóshbasshy dep biledi. Elińiz­diń qarqyndy damýy ózińizben tikeleı baılanysty. Sizdiń sarabdal saıasatyńyzdyń arqasyn­da Qytaı Halyq Respýblıkasy áleý­mettik-ekonomıkalyq jań­ǵyrý jáne azamattardyń ál-aýqatyn jaqsartý isinde eren jetistikke jetetinine senimdimin. Biz jańa tarıhı kezeńde ózine tán ereksheligi bar sosıalızm negizin qalap jatqan Qytaı halqynyń mol tabystaryna shyn qýanamyz. Sizdiń maǵan jáne barsha Qazaqstan halqyna degen qurmetińizdi joǵary baǵalaımyn, – dedi Qasym-Jomart Toqaev.

Prezıdent Qytaıdy Qazaqstannyń tatý kórshisi jáne ýaqyt tezinen ótken senimdi strategııalyq seriktesi dep atady. Memleket basshysynyń aıtýynsha, eki eldiń qarym-qatynasy turaqty sıpatqa ıe ári oǵan geosaıası syn-qaterler men dúrbeleńder, sondaı-aq halyqaralyq ahýal teris áser etpeıdi.

– Qytaı Qazaqstanmen aradaǵy yntymaqtastyǵynda qandaı da bir saıa­sı shart qoımaǵan. Bizdiń egemendi­gimiz ben qaýipsizdigimizge kórsetken qoldaýyńyzdy baǵalaımyz. Qytaıdyń beıbitshilik bastamalaryn qoldaımyz. Elińizdiń ádil álemdik tártip ornatý áreketterin qýattaımyz, – dedi Qazaqstan Prezıdenti.

Qasym-Jomart Toqaev eki eldiń BUU, ShYU, AО́SShK sekildi halyqaralyq jáne óńirlik uıymdar aıasynda, sondaı-aq BRIKS + jáne «Ortalyq Azııa – Qytaı» formatynda joǵary deńgeıdegi yqpaldastyq ornatqanyn atap ótti.

Memleket basshysy QHR-dyń Qazaq­stannyń eń iri saýda-ekono­mıkalyq seriktesi ekenin eske saldy. Byltyrǵy qorytyndy boıynsha ekijaqty saýda-sattyq kólemi 44 mlrd dollarǵa jetken. Bul – rekordtyq kórsetkish.

Sonymen qatar Prezıdent máde­nı-gýmanıtarlyq saladaǵy eleýli jetis­tikterge toqtaldy. Atap aıtqanda, eli­mizde mádenıet ortalyqtary, Lý Ban sheberhanalary, Qytaı joǵa­ry oqý oryndary men ǵylymı-teh­nıka­lyq ortalyqtarynyń fılıaldary ashyldy. Qazaqstan Konfýsıı orta­lyq­taryna qoldaý kórsetedi. 2025 jyl «Qazaq­standaǵy Qytaı týrızminiń jyly» bolyp jarııalandy. Bul eki­jaqty yntymaqtastyqty tereńdetýge, ózara senimdi nyǵaıtýǵa septigin tıgizedi.

Qasym-Jomart Toqaev atom energetıkasy salasyna arnaıy toqtaldy.

– Biz Qazaqstanda birneshe, tym bolmaǵanda eki-úsh AES salý týraly sheshim qabyldadyq. Osy mańyzdy joba­ǵa iri kompanııalardy tartýǵa qatys­ty jumys júrgizilip jatyr. Qazaqstan Respýblıkasynyń Atom energııasy jónindegi agenttigi quryldy. AES qury­lysy boıynsha Qytaıdyń CNNC kompanııasyn senimdi strategııalyq seriktes retinde qarastyryp otyrǵanymyzdy erekshe atap ótkim keledi. Álemge áıgili kompanııa bizdiń naryqta óz ornyn tabatyny anyq. Sonymen qatar Qazaqstan – Qytaıǵa tabıǵı ýran men ıadrolyq otyn jetkizip otyrǵan senimdi el, – dedi Prezıdent.

Sı Szınpın qazaq jerinde kórsetilgen syı-qurmet úshin Prezıdentke rızashylyǵyn bildirdi. Ol Qasym-Jomart Toqaevtyń basshylyǵymen Qazaqstan ulttyq jańǵyrý jolyna túskenin, el damýynda tyń tabystarǵa qol jetkizip kele jatqanyn atap ótti.

– Tatý kórshi ári strategııalyq seriktes retinde biz Sizderdiń jetis­tikterińizge tántimiz. Sizder úshin qýanyshtymyz. Qytaı men Qazaq­stannyń qarym-qatyna­sy qubylmaly álemniń synyna tótep berip, qarqyndy damyp keledi. Bul – tek geografııalyq turǵydan jaqyndyqtyń, ǵasyrlarǵa ulasqan dostyqtyń arqasy ǵana emes, elderimizdiń órkendeý jolyndaǵy tabıǵı suranysy. Keıingi jyldary birlesken kúsh-jigerdiń nátıjesinde taǵdyry ortaq Qytaı men Qazaqstan arasyndaǵy yqpaldastyq jańa mán-mazmunmen tolyǵyp jatyr. Birqatar áleýmettik mańyzy bar jobalardyń júzege asyrylýy qos halyqqa aıtarlyqtaı paıda ákeldi. Men О́zińizben tize qosyp, Qytaı-Qazaqstan dostyǵyn nyǵaıtýǵa, óńirdiń jáne jalpy álemniń damýyna eleýli úles qosý úshin eki eldiń san qyrly yntymaqtastyǵyn odan ári ilgeriletýge ázirmin, – dedi QHR Tóraǵasy.

Kelissóz barysynda eki el ynty­maqtastyǵynyń barlyq baǵyt boıynsha keleshegi talqylandy. Baıyrǵy dostyq pen ózara qurmetke arqa súıegen eki el basshylary emen-jarqyn áńgimelesti.

Prezıdent Qasym-Jomart Toqaev pen QHR Tóraǵasy Sı Szınpın júr­gizgen kelissóz nátıjesinde 24 úki­metaralyq jáne vedomstvoaralyq qujatqa qol qoıyldy. Eki el delega­sııasynyń músheleri energetıka, aeroǵarysh, sıfrlandyrý, keden, aýyl sharýashylyǵy, elektrondy saýda, týrızm, zııatkerlik menshik, medısına, medıa, ǵylym, óńiraralyq baılanys salalaryndaǵy yntymaqtastyqty qamtı­tyn qujattarmen almasty. Olar­dyń ishinde ınvestısııalardy kóter­meleý jáne ózara qorǵaý, tehnıkalyq-ekonomıkalyq yntymaqtastyq týraly úkimetaralyq kelisimder bar.