Atalǵan zańda elimiz úshin basym sport túrlerin aıqyndaýdyń jańa, obektıvti ádistemesi belgilengen. Buǵan deıin mundaı sport túrleriniń tizimi kóbine sýbektıvti baǵalaýǵa, jekelegen sport túrleriniń tanymaldyǵyna nemese dástúrli tájirıbege súıenip jasalatyn. Endigi kezekte irikteýdiń negizgi ólshemi retinde ulttyq quramalardyń Olımpıada, Paralımpıada, Sýrdlımpıada, Azııa jáne Para Azııa oıyndaryndaǵy naqty jetistikteri esepke alynady.
Týrızm jáne sport mınıstrliginiń málimetinshe, qazirgi ýaqytta 60-tan astam basym sport túri anyqtalǵan. Olardyń shamamen 30-ǵa jýyǵy elimizdiń barlyq óńirinde damytylyp keledi. Sonymen qatar zańda óńirlik deńgeıde de basym sport túrlerin bekitý múmkindigi qarastyrylǵan. Bul rette jergilikti jerdiń sporttyq dástúrleri, ınfraqurylymdyq múmkindikteri men jattyqtyrýshylyq áleýeti eskeriledi. Mundaı ıkemdi tásil sport salasyna bólinetin resýrstardy tıimdi paıdalanýǵa jáne el kóleminde sportty teńgerimdi damytýǵa yqpal etedi.
Qujattaǵy taǵy bir mańyzdy jańalyq – «múgedektigi bar sportshyny súıemeldeýshi» uǵymynyń zańnamalyq negizde bekitilýi. Jańa norma birinshi top múgedektigi bar sportshylarǵa sporttyq jarystar men is-sharalarǵa qatysý barysynda resmı súıemeldeý qyzmetin paıdalanýǵa quqyq beredi.
Qazirgi tańda elimizde múgedektigi bar azamattardyń jalpy sany 700 myńnan asady, onyń ishinde 98 myńnan astamy – balalar. Súıemeldeýshi tulǵaǵa resmı mártebe berý – sportshylardyń jattyǵý men jarys oryndaryna qoljetimdiligin arttyrý, olardyń quqyqtaryn qorǵaý jáne ınklıýzıvti sportty damytý baǵytynda mańyzdy qadam sanalady.
