Bul saparǵa qala ákiminiń orynbasarlary, «Qazseldenqorǵaý» memlekettik mekemesiniń, Tótenshe jaǵdaılar departamenti men sala basqarmalarynyń basshylary da bardy.
Tikushaqpen sholý barysynda «Medeý», «Úlken Almaty», «Qarǵaly» sý bógetteri men Aqsaı, Kishi jáne Úlken Almaty ózenderi basseınderinde ornalasqan №6, 8, 9, 10 jáne 13-Bıs muzdaq kólderi sekildi negizgi selden qorǵaý nysandary qamtyldy. Tótenshe jaǵdaılar departamenti, «Qazseldenqorǵaý» jáne Seısmıkalyq qaýipsizdik pen jumyldyrý daıyndyǵy basqarmasy basshylarymen birlesip, aldaǵy jumystar talqylandy.
Búginde Almaty taýlarynda 51 muzdaq kól bar. Onyń 14-inde buzylý qaýpi bolsa, 6-ýy qaýiptiligi joǵary nysandar qatarynda. Bul kólder halyq tyǵyz qonystanǵan aımaqtar arqyly aǵatyn ózenderdiń bastaýynda ornalasqan.
«Qazseldenqorǵaý» mekemesiniń AGETÝ basshysy Samat Dáýlenqanovtyń aıtýynsha, qaýipti nysandarda sý deńgeıin tómendetý, sıfon jelilerin iske qosý, evakýasııalyq arnalardy tazalaý sekildi aldyn alý sharalary josparlanǵan. Sondaı-aq, baqylaý kúsheıtilip, 31 avtomatty stansııa, 23 baqylaý beketi men 8 maýsymdyq núkte jumys istep tur. Arnaıy tehnıkamen jabdyqtalǵan jedel is-qımyl toby qurylyp, kezekshilik uıymdastyrylǵan.
Muzdaq kólderdi tikushaqpen sholǵan kezde gıdrotehnıkalyq qurylystar – bógetter men selden qorǵaý bógetteriniń tehnıkalyq jaǵdaıyna erekshe nazar aýdaryldy. Keıbir nysandarǵa jóndeý nemese qaıta qurý sheshimin qabyldaý úshin egjeı-tegjeıli tekseris qajet ekeni anyqtaldy. Sondaı-aq, taýly bólimshelerdi arnaıy tehnıkamen, qural-jabdyqtarmen jáne meteoquraldarmen qosymsha jabdyqtaý qajettiligi aıtyldy.
Marshrýt Almaty taý klasteriniń ortalyq aımaǵy arqyly aıaqtaldy. «Chimbulak Development» JShS dırektory Rınat Ábdirahmanov arqan joldar jelisin keńeıtý, trassalar men ınfraqurylymdy damytý josparyn tanystyrdy. 2028 jylǵa qaraı klasterlik aımaqtyń ótkizý qabileti kúnine 6 myńnan 34 myń adamǵa deıin artpaq. Joba jeke ınvestorlar men halyqaralyq seriktesterdiń qarjysy esebinen júzege asyrylyp jatyr.
Qala basshysy týrızmdi damytý tabıǵı qaýip-qaterlerden almatylyqtar men qala qonaqtaryn qorǵaý sharalarymen tyǵyz baılanysta júrgizilýge tıis ekenin atap ótti.
