Massachýsets shtatyndaǵy Výster qalasynda ornalasqan «Worcester Polytechnic Institute» bazasynda ótken «WPI Annual FLL Event» (WAFFLE) atty halyqaralyq robottehnıka chempıonatyna qatysýshylar álemniń 108 elinen kelipti. 650-ge tarta komanda qatysqan saıysta ár komanda óz jobasy men ınnovasııalyq ıdeıasyn ortaǵa salyp, eń myqtyny anyqtaǵan.
– Osy baıraqty básekede Oral qalasyndaǵy Nazarbaev zııatkerlik mektebiniń oqýshylary qurǵan «Tidal Tumble» komandasy «Engineering Excellence Awards» atalymynda 2-oryn alyp, júldeger atandy. Bul – tek mekteptiń ǵana emes, tutas Qazaqstannyń jetistigi! – deıdi atalǵan mekteptiń baspasóz hatshysy Gúlnaz Nuǵmanqyzy súıinshi habardy jetkizip.
Quramynda Álıhan Serik, Taıyr Nazar, Ádilet Seıtenov, Ilııas Serikov, Taıyr Ýáshev, Nurymhan Berkin, Ádilhan Serikov, Farrýh Tóreqoja, Azat Ábdirahmanov syndy jas zııatkerler bar oraldyq komanda «Agua Aeris» atty aýadan sý óndiretin qurylǵyny jahandyq ǵalymdarǵa tanystyrǵan. Sóıtip, el namysyn qorǵaı otyryp, qazaq jastarynyń aqyl-parasatyn, bilimin jáne ınjenerlik qabiletin álemge áıgiledi.
«AquaAeris — bul aýyzsý tapshylyǵy máselesin sheshýge arnalǵan ınnovasııalyq joba. Qurylǵy aýadan ishýge jaramdy sýdy óndire otyryp, álemniń kez kelgen núktesinde senimdi ári ekologııalyq taza sý kózimen qamtamasyz etýge múmkindik beredi. Bul qurylǵy aýyzsý tapshylyǵy máselesin sheshýge kómektesip, sýasty álemine túsetin júktemeni azaıtady», deıdi komandanyń ǵylymı jetekshisi Armat Bolatuly.
Osylaısha, oraldyq zııatkerler robot qurastyryp, joba qorǵap qana qoımaı, Qazaqstannyń atyn jer-jahanǵa tanymal etti.
Batys Qazaqstan oblysy
