Qatar Airways áýe kompanııasy sársenbi kúni resmı málimdeme jarııalap, 23 maýsym, dúısenbi kúni Taıaý Shyǵystaǵy áskerı-saıası jaǵdaıdyń ýshyǵýyna baılanysty Qatar aýmaǵyndaǵy áýe keńistiginiń ýaqytsha jabylǵanyn jáne reıster kestesi qalpyna keltirilip jatqanyn habarlady.
Málimdemege sáıkes, reısterdegi kidirister 26 maýsymdy qosa alǵanda saqtalýy múmkin.
Týyndaǵan jaǵdaıdy retteý maqsatynda kompanııa 2025 jylǵy 30 maýsymǵa deıingi ushý kúni kórsetilgen bıletteri bar jolaýshylarǵa kelesi múmkindikterdi usynady:
— Sapar kúnin aıyppulsyz ózgertý (jańa ushý kúni 2025 jylǵy 15 shildege deıingi aralyqta bolsa);
— Sapardan bas tartqan jaǵdaıda paıdalanylmaǵan bılettiń tolyq qunyn qaıtarý.
Qatar Airways málimdemesinde kompanııa qyzmetkerleri jolaýshylarǵa jan-jaqty kómek kórsetý úshin tolyq rejımde jumys istep jatqany atap ótildi.
Qazirgi tańda áýe kompanııa 170-ten astam baǵytty qamtıtyn áýe jelisin kezeń-kezeńimen qalpyna keltirip jatyr. Dohadaǵy Hamad halyqaralyq áýejaıynda jáne ózge de mańyzdy habtarda qosymsha personal jumyldyrylyp, jolaýshylarǵa kómek kórsetilip jatyr.
«Biz jolaýshylarymyzdyń sabyry, túsinistigi men senimi úshin alǵys aıtamyz. Bizdiń basty mindetimiz — jolaýshylardyń dittegen jerine múmkindiginshe keshikpeı jetýin qamtamasyz etý», delingen kompanııanyń resmı úndeýinde.
Aıta keteıik, búgin, sársenbi kúni qazaqstandyq avıakompanııalar Birikken Arab Ámirlikteri men Qatardan jolaýshylardy evakýasııalaı bastady. Air Astana Taıaý Shyǵys baǵytyndaǵy reısterdi qaıta jandandyryp jatyr.
Eske salaıyq, 23 maýsym kúni Iran Qatardaǵy «Ál-Ýdeıd» amerıkalyq áskerı bazasyna zymyran soqqysyn jasady.
