Foto: Sıfrlyq damý, ınnovasııalar jáne aeroǵarysh ónerkásibi mınıstrligi
Sıfrlyq qoǵamdyq ınfraqurylym – bul sıfrlyq tólemder, sáıkestendirý jáne derekter almasý júıeleriniń qaýipsiz ári ózara árekettese alatyn jıyntyǵy. Sıfrlyq dáýirde bul júıeler ekonomıka men áleýmettik ómirge tolyqqandy qatysýdyń basty alǵyshartyna aınaldy. DPI barlyq memleketterdiń ornyqty ári ınnovasııalyq ekonomıka quryp, azamattardyń ál-aýqatyn qamtamasyz etýi úshin qajet.
«50-in-5» bastamasynyń negizgi maqsaty – 2028 jylǵa deıin 50 el kem degende bir DPI elementin engizýi. Bul tájirıbe almasý jáne ashyq sıfrlyq ónimderdi qoldana otyryp, birlesken sheshimder ázirleý shyǵyndardy azaıtyp, transformasııany jedeldetýge múmkindik beretinine negizdelgen.
«Qazaqstandaǵy sıfrlyq transformasııanyń basty ózegi – adam. Biz úshin tehnologııa – jaı ǵana tehnologııa emes, ol azamattardyń ómirin jaqsartýǵa baǵyttalǵan qural. Osy maqsatta biz ár qadamymyzdy halyq ıgiligi úshin jasaı otyryp, ashyq, túsinikti jáne tıimdi sıfrlyq memleket quryp jatyrmyz. Sıfrlyq sheshimder qashyqtyqty qysqartady, osy arqyly adamdar qaıda tursa da, biz olarǵa jaqynyraq bola alamyz. «50-in-5» bastamasyna qosylý – adamǵa baǵyttalǵan sıfrlyq transformasııamyzdy údetip, shyǵyndardy azaıtýǵa múmkindik beretin mańyzdy qadam», dedi sala mınıstri Jaslan Mádıev.
Qazaqstanda sıfrlyq qoǵamdyq ınfraqurylymnyń negizgi elementteri tabysty engizilip, búkil el aýmaǵynda keńeıtilip jatyr. Sıfrlyq sáıkestendirý júıesiniń (Digital ID) negizgi bóligi – eGov Mobile mobıldi qosymshasy. Bul – resmı elektrondyq úkimettiń sýpermobıldi qosymshasy, ol qaýipsiz avtorızasııa, qashyqtan jeke basyn rastaý jáne memlekettik qyzmetterdiń keń aýqymyna qol jetkizý múmkindigin qamtamasyz etedi.
Búginde eGov Mobile qosymshasyn 10,9 mıllıonnan astam otandastarymyz paıdalanady, onyń ishinde aı saıynǵy belsendi aýdıtorııa 5,3 mıllıon adamdy quraıdy, al táýligine orta eseppen 354 myń paıdalanýshy qosymshaǵa kiredi. «Qyzmetter» bóliminde 200 túrli servıs qoljetimdi, al eGov Mobile arqyly kórsetilgen memlekettik qyzmetterdiń jalpy sany 82 mıllıonnan asty.
Paıdalanýshylardyń erekshe qyzyǵýshylyǵyn «Sıfrlyq qujattar» bólimi týdyrady. Onda jeke kýálikten bastap júrgizýshi kýáligine deıin 38 túrli elektrondyq qujat qoljetimdi. Bul fýnksııa iske qosylǵannan beri qujattar 25,7 mıllıonnan astam ret qoldanylǵan.
Qazaqstandaǵy memlekettik júıeler arasynda derekter almasý úshin Smart Data Ukimet aqparattyq-taldamalyq platformasy jumys isteıdi. Oǵan 124 memlekettik organnyń aqparattyq júıesi biriktirilgen. Bul ıntegrasııa azamattardyń ómirlik jaǵdaılaryna avtomatty túrde jaýap retinde proaktıvti memlekettik qyzmetterdi ázirleýge múmkindik beredi.
Búginde áleýmettik baǵyttaǵy 45 proaktıvti memlekettik qyzmet ázirlengen. Olar azamattarǵa, ásirese ómirlik qıyn jaǵdaıǵa tap bolǵan adamdarǵa baǵyttalǵan ataýly kómek kórsetýge arnalǵan. Osyndaı qyzmetter 4,3 mıllıonnan astam ret kórsetildi. Smart Data Ukimet, Elektrondyq úkimet shlıýzi jáne Smart Bridge birigip, ulttyq derekter almasý júıesiniń negizin quraıdy.
«50-in-5» – bul sıfrlyq qoǵamdyq ınfraqurylymdy engizý arqyly sıfrlyq kún tártibin jedeldetýge baǵyttalǵan elder bastamasy. Bul bastama Bıll jáne Melında Geıts qory, Sıfrlyq qoǵamdyq ınfraqurylym ortalyǵy, Co-Develop uıymy, Sıfrlyq qoǵamdyq ıgilikter alıansy jáne BUU Damý baǵdarlamasymen (PROON) birlesip júzege asyrylady. Budan bólek, bastamaǵa GovStack, Amerıkaaralyq damý banki, IýNISEF jáne BUU-Áıelder uıymy qoldaý kórsetedi.
«50-in-5» bastamasy aıasynda elder sıfrlyq kóshbasshylarmen tájirıbe almasyp, halyqaralyq úzdik tájirıbelerdi zerdelep, tehnıkalyq jáne ádistemelik qoldaý ala alady. Qazaqstan úshin bul bastamaǵa qatysý – ulttyq sıfrlyq áleýetti nyǵaıtyp, árbir azamattyń múddesine jumys isteıtin ornyqty sıfrlyq ınfraqurylymdy damytýǵa baǵyttalǵan mańyzdy qadam.
