Iri óner ortalyqtarynan alysta, shalǵaı óńirdiń aýdan-aýyldarynda eleýsiz ómir súrip júrgen jastar qabileti bola tura, ózdiginen aýqymdy alańdarǵa joldama taýyp, kásibı qoldaýdy sezine bermeıdi. «Juldyzdy jol» jobasy qaltarysta júrgen sol jastardy taýyp, kópke tanystyryp qana qoımaı, sahna talap etetin bilim men qarymdy sińire otyryp, mýzykalyq áleýetin damytýdy kózdeıdi. Jańa urpaqtyń eń jarqyn ókilderin bir alańǵa biriktirýdi maqsat etken televızııalyq talant-shoý baǵdarlamasy eń daryndy jasty iriktep shyǵarmaq.
«Juldyzdy joldyń» buǵan deıingi osy tektes mýzykalyq jobalardan basty ereksheligi – onyń úsh sanattan turatyny. Televızııalyq saıys vokal, klassıkalyq aspaptar jáne halyq aspaptary boıynsha saralanady. Búkil elimiz boıynsha digital-kastıng ótkizilip, úsh apta ishinde uıymdastyrýshylar eldiń túkpir-túkpirinen 354 ótinim qabyldady. Qatysýshylar ishinde mektep oqýshylary, stýdentter, daryndy jas mýzykanttar bar. Jobaǵa vokal sanaty boıynsha 204 ótinim kelip túsken. Klassıkalyq aspaptar boıynsha – 81, al halyq aspaptary baǵytynda 69 ótinim tirkeldi. Irikteý kezeńiniń ózi birneshe saty boıynsha júrgizilip, mamyr aıynda qatysýshylar onlaın tyńdaýǵa qatysyp, olardyń ónerin salanyń kásibı mamandary tyńdap, baǵalady. Synnan súrinbeı, sátti ótken qatysýshylar kelesi kezeńge jiberildi. Osy qatysýshylardyń arasynan iriktelip shyqqan 48 adam qazir Almatyǵa kelip, shyǵarmashylyq lagerde daıyndyqty bastap ketti», deıdi jobanyń kreatıvti prodıýseri Gýlahcha Akrıeva.
Úzdikterdi anyqtaıtyn mýzykalyq baıqaýdyń birinshi kezeńine qatysatyn 48 oryndaýshynyń ónerin qazylar alqasy muqııat saralap, mańyzdy sheshimin aıtady. Aýyr da bolsa, ár kategorııadan bir qatysýshydan shyǵarylyp, jeńis jolyndaǵy jolyn jalǵastyrý úshin úsh qatysýshy kelesi kezeńge ótedi.
«Myqtylardyń dýeli» atalatyn jobanyń ekinshi kezeńinde 36 ónerpaz ǵana qalady. Biri qýanyp, biri jabyrqap, túrli kóńil kúıdi bastan keshe júrip, osy kezeńge jetken qatysýshyǵa júkteler jaýapkershilik pen talap ta qıyndaı túsedi. Endi ár sanattaǵy ár epızod saıyn sahnaǵa 6 qatysýshy shyǵyp, juptasyp óner kórsetedi. Eki ónerpaz ortaq shyǵarmany oryndaý arqyly derbes darynyn kórsetip qana qoımaı, sahnadaǵy seriktesimen úılesimdi óner kórsete alatynyn dáleldeýi kerek. Sahnada ózin senimdi ustaý, sheberlik, qazylar alqasy men kórermen júregin jaýlaı alý sekildi tolyp jatqan talapty oryndaı alǵandary eń basty kezeń – «Kórermen kózaıymyna» aınalý baqytyna bastaıtyn aınalymǵa ótedi. Bul kezeńde jobada eń myqty, este qalatyn 18 ónerpaz ǵana qalady. Sońǵy saıystaǵy sheshýshi sát kórermen daýysy arqyly baǵalanady. Al aqtyq márege jetken alty qatysýshynyń baǵy áleýmettik jelide daýys beretin kórermen talǵamyna táýeldi bolmaq. Aqtyq syn – Gala konsert telearnanyń tikeleı efırinde ótip, sharyqtaý shegine jetken óner shaıqasynda kórermenniń súıispenshiligine bólenip, jeńiske jetken qatysýshynyń aty-jóni jarııalanady. Osylaısha, kórermender qatysýshynyń ónerdegi alǵashqy qadamynan bastap úlken sahnaǵa deıingi jolyna tikeleı kýá bolady.
Jańa maýsymnyń televızııalyq tusaýkeseri bıyl qazan aıynda, kúzgi telemaýsymǵa josparlanǵan. Jas ártistermen Qanat Omarov, Abylaı Tilepbergen jáne Nurgúl Nuǵymanova sekildi tanymal mamandar jumys isteıdi. Olar úzdikterdi tańdaýǵa kómektesip, tálimgerlik etedi. Al jobanyń júrgizýshisi – belgili estrada ánshisi Álı Oqapov. «Juldyzdy jol – 2025» – jaı ǵana televızııalyq baıqaý emes, bul – urpaqtardy sabaqtastyratyn, óńirlerdi biriktiretin mádenı qozǵalys. Sahnada jańa esimderdiń tanylyp, zamanaýı áýen men qazaq mýzykasynyń jańa býynyn qalyptastyrýǵa serpin beretin kásibı múmkindik.
ALMATY
