Áıelderdiń álemdik reıtınginde Assýnta Skýttodan bólek, Italııanyń taǵy bir dzıýdoshysy kósh bastap tur. Ol – Alıche Bellandı. 78 kg salmaqta beldesetin balýannyń qorjynynda álem chempıonattarynyń tolyq júlde jıyntyǵy bar. Bellandı 2023 jyly Dohada qola alsa, 2024 jyly Abý-Dabıde kúmispen kúpteldi. Al kúni keshe ǵana ol Býdapeshtte bas júldeni oljalady. Sondaı-aq Alıche Parıj Olımpıadasynda altynnan alqa taqty. Sondaı-aq kosovolyq Dıstrııa Krasnıchı (52 kg), Eterı Lıpartelıanı (57 kg), kanadalyq Katrın Boshmen-Pınar (63 kg), Lara Svetko (70 kg) jáne fransııalyq Romana Dıko (+78 kg) salmaq dárejelerinde dara tur.
Joǵaryda esimderi atalǵan burymdylar arasynan Býdapeshtte Assýnta Skýtto, Alıche Bellandı, Eterı Lıpartelıanı álem chempıony atandy. Qalǵandaryna ondaı baq buıyrmady. Máselen, Dıstrııa Krasnıchı men Lara Svetko fınalda utyldy. Romana Dıko qola medaldy qanaǵat tutty. Olardyń salmaqtarynda japonııalyq Ýta Abe (52 kg), Harýka Kadzıý (63 kg), Sıho Tanaka (70 kg) jáne ońtústikkoreıalyq Kım Ha Iýn (+78 kg) ozdy. Bir qyzyǵy, sońǵy álemdik dodada 3 altyn, 1 kúmis jáne 2 qola medal ıelenip, jalpy esepte aldyna jan salmaǵan Japonııanyń birde-bir qyzy IJF-tiń reıtınginde kósh bastaýǵa qajetti upaı qoryn jııa almady.
Qazirgi kezde TOP-10-dyqtyń qataryna Fransııanyń 12 dzıýdoshysy endi. Bul – áıelder arasyndaǵy eń úzdik kórsetkish. Rasynda da, olardyń myqtylyǵy esh kúmán týǵyzbaıdy. Sebebi fransýzdardyń qaı qyzyn alsaq ta, árqaısynyń ataǵynan at úrkedi. Atalǵan komandanyń basty qarsylasy Japonııanyń da jaǵdaıy jaqsy. Kúnshyǵys eliniń 8 balýany úzdikter sanatynda. Úshinshi orynda Germanııa quramasy. Nemis qyzdarynyń altaýy sol mejeden kórindi. Sondaı-aq ozyq ondyqtyń qataryna myna memleketterdiń burymdylary enip otyr: Italııa, Ispanııa, BAÁ, Izraıl, Nıderland, Horvatııa – 3, Reseı, Qytaı, Kosovo, Majarstan, Kanada, Ońtústik Koreıa, Slovenııa – 2, Qazaqstan, Shvesııa, Mońǵolııa, О́zbekstan, Grýzııa, Serbııa, Aýstralııa, Aýstrııa, Grekııa, Portýgalııa, Ulybrıtanııa, Brazılııa – 1.
Álemdik reıtıngte Ábıba Ábýjaqynovanyń ekinshi orynda turǵanyn joǵaryda aıttyq. Jerlesterimizdiń arasyndaǵy odan keıingi jaqsy nátıje Ǵalııa Tynbaevaǵa tıesili. 48 kg salmaqta kúresip júrgen ol 19-oryndy ıelendi. Al ózge dzıýdoshy qyzdarymyzdyń nátıjeleri mynadaı: Nazgúl Maratova (+78 kg) – 33, Esimgúl Kýıýlova (63 kg) – 39, Kámıla Berliqash (+78 kg) – 40, Aqerke Ramazanova (+78 kg) – 59, Arýna Jankeldına (78 kg) – 60, Baqyt Qusaqbaeva (57 kg) – 62, Ekaterına Tokareva (70 kg) – 68, Karına Tákıeva (+78 kg) – 69, Margarıta Grısenko (78 kg) – 96 kg, Samalaı Erǵalıeva (63 kg) – 98, Tolaǵanaı Ábeýova (52 kg) 100-oryn.
Mine, TOP-100-dikke engen dzıýdoshylarymyz osylar. Shyny kerek, bul kúnderi asa jeńil salmaqta tabysty óner kórsetip júrgen Ábýjaqynovanyń ǵana aıaq alysy qýantady. Ol qatarynan úsh álem chempıonatynan oljaly oraldy. Alǵashqy ekeýinde qola medal alsa, bul joly kúmiske qol jetkizdi. Osyǵan deıin elimizdiń áıelder dzıýdosy ókilderiniń birde-bireýi tórtkúl dúnıeniń teńdessizderi jınalǵan jarystyń fınalynda kúresken emes. Sol kóshti Ábıba bastady. Onymen bir salmaqta beldesetin Ǵalııa Tynbaevanyń da aıaq alysy jaman emes. Býdapeshtte joly bolmaǵanymen, ol basqa da halyqaralyq týrnırlerde jaqsy óner kórsetip júr. Byltyr Ǵalııanyń «Qazaqstan barysynda» top jaryp, Zagrebtegi Grand-Slemde kúmis medal ıelenýi, bıyl Bangkoktaǵy Azııa chempıonatynda úzdik úshtikti túıindeýi – osy sózimizdiń aıqyn aıǵaǵy. О́kinishke qaraı, ózge qyzdardan ondaı qarqyn baıqalmaıdy.
