Balalar men jasóspirimder sportyn damytýǵa baǵyttalǵan jobany júzege asyrýǵa 8 mln eýro ınvestısııa salynady. Munda elimizdiń barlyq óńirinen ala dop qýýǵa qumar balalar qabyldanyp, alańsyz daıyndalýyna tolyqqandy jaǵdaı jasalady.
Saltanatty sharany «TAV Airports Holding» bas dırektory Serkan Kaptan quttyqtaý sózben ashty. Ol kompanııanyń bul jobaǵa qatysýy áleýmettik jaýapkershilikpen ǵana shektelmeıtinin atap aıtty. Onyń sózinshe, fýtbol akademııasy kompanııanyń ornyqty damýynda strategııalyq mańyzǵa ıe.
«TAV Airports Holding» úshin turaqty damý baǵyttary ortaq jaýapkershilikke, qoǵammen tyǵyz baılanys ornatýǵa, bıznesten bólek maqsatqa umtylýǵa negizdelgen. Korporatıvtik áleýmettik jaýapkershilik – barsha qyzmetimizdiń ustyny. Jastardyń damýyna, qoǵamnyń ıgiligine baǵyttalǵan bastamalardy qoldaý – strategııamyz ben is-áreketimizdi aıqyndaıtyn qundylyq. Jalpy, sport adamdardy jaqyndastyryp, ár balanyń boıyndaǵy qabilet-qarymyn ashady. Sondyqtan Qazaqstan fýtbolynyń damýyna úles qosatynymyzdy maqtan etemiz. О́skeleń jastardy qoldaý, olardy shıratyp, bıik shyńǵa shyǵarý – úlken mártebe», dedi Serkan Kaptan.
Akademııanyń qurylysy – adam kapıtalyna, balalardyń bolashaǵy men sport áleýetin arttyrýǵa baǵyttalǵan uzaqmerzimdi ınvestısııa. Munda jas talanttardy anyqtap, olardy damytýǵa júıeli negiz qalyptastyryp, kásibı daıyndyqpen qatar, onda turýǵa, bilim alýǵa, fýtbol qaýymdastyǵyna beıimdelýge qajetti jaǵdaı jasalady.
Fýtbol federasııasynyń prezıdenti Marat Omarov akademııada jas fýtbolshylarǵa júıeli túrde zamanaýı fýtbol talaptaryna saı daıarlanýǵa barlyq jaǵdaı jasalatyndyǵyn málim etti.
«Búgin irgetasy qalanǵan fýtbol akademııasy – Fýtbol federasııasynyń asa aýqymdy, strategııalyq mańyzy zor alǵashqy jobasy. Ol elimizdegi jas fýtbolshylardy daıarlaý júıesin ózgertip, jańa kózqaraspen qaraýǵa múmkindik beredi. Akademııaǵa qabyldanǵan balalar osynda turyp, Talǵardyń mektepterinde oqıdy. Tústen keıin fýtbolǵa daıarlanady. Osy jerde tamaqtanyp, tynyǵady. Demalys kúnderi úılerine barady. Baǵdarlama 2-3 jylǵa arnalǵan», dedi M.Omarov.
Qonaqtardyń sózinen soń, akademııanyń irgetasyn qalaý rásimi saltanatty túrde jarııalandy. Is-sharada joba basshylyǵy fýtbol dobyna qoltańbalaryn qoıyp, ony jas sportshylarǵa tabystady.
Jalpy aýmaǵy 5 520 sharshy metr bolatyn akademııa ǵımaraty úsh negizgi bloktan turady: sporttyq, ákimshilik-turmystyq jáne jataqhana. Sporttyq blokta jabyq fýtbol zaly, jalpy dene daıarlyǵy zaly, qalpyna kelý basseıni, kıim aýystyratyn, qyzmettik bólmeler bolady. Ákimshilik-turmystyq blokqa jattyqtyrýshy kabınetteri, medısınalyq, ońaltý bólmeleri, májilis zaly, ashana, tehnıkalyq bólmeler ornalasady. Tórtqabatty jataqhanada oqýshylar men qyzmetkerlerge arnalǵan bólmeler, demalys, jeke daıyndyq aımaqtary bar.
«KFF Academy by Almaty International Airport» – balalar men jasóspirimder fýtbolyn damytý júıesin nyǵaıtý jolyndaǵy mańyzdy qadam. Bul jańa býyn sportshylaryn daıarlaýǵa arnalǵan turaqty ınfraqurylymdy qalyptastyrý jumysynyń bastamasy. Akademııa áriptestik qarym-qatynas pen tájirıbeni ushtastyrǵan el sportyn jetildirýdegi sapaly ári júıeli kózqarastyń úlgisine aınalmaq.
Saltanatty is-sharaǵa qatysqan Talǵar aýdanynyń ákimi Tańat Aıdarbekov sport mándi de maǵynaly uzaq ómir súrýdiń birden-bir joly ekenin aıryqsha ataı kele, óńirde salamatty ómir saltyn qalyptastyrýǵa yqpal etetin 243 sporttyq nysan halyqqa qyzmet kórsetetinin, onyń ishinde 69 sport zal, 59 sport alańy, 13 sońǵy úlgidegi shaǵyn fýtbol alańy, tennıs korty, taý shańǵysy, basqa da 17 sport nysany búginde turaqty jumys jasap jatqanyn atap aıtty. Endi solardyń qataryn tolyqtyratyn fýtbol akademııasynda elimizdiń abyroıyn asqaqtatatyn jasóspirim fýtbolshylar jattyǵyp, dittegen maqsatqa jetýlerine tilektestigin bildirdi.
Fýtbol akademııasy demekshi, 2009 jyldan bastap 2018 jylǵa deıin elimizden bir top bala Brazılııadaǵy áıgili «Ole Brazıl» akademııasyna fýtboldyń qyr-syryn meńgerýge attanǵan edi. Degenmen, 80-ge jýyq balanyń arasynan tek Magomed Paragýlgov qana ulttyq qurama sapynda nebári eki oıyn ótkize aldy.
Joba bastapqyda zor senim týdyrǵanymen, nátıje kóńil kónshitpedi. Bul sátsizdikke ne sebep boldy? Brazılııalyq bapkerlerdiń deńgeıi tómen be, álde bizdiń balalardyń áleýeti jetkiliksiz be? Qalaı bolǵanda da, jobadan el kútkendeı birde-bir tolyqqandy fýtbolshy shyqpady. Ár jyly bólingen 83 mıllıon teńgeden astam qarjy bosqa rásýa boldy.
Endi sol suraq taǵy da kún tártibinde tur. Talǵar fýtbol akademııasynyń bolashaǵy qandaı bolmaq? Taǵy da akademııa balalary jankúıerlerin jerge qaratyp júrmeı me?
Almaty oblysy
