Departament basshysynyń orynbasary Nurlan Ábdıevtiń aıtýynsha, jospardan tys júrgizilgen tekserýler kezinde josyqsyz kásipkerlerge 55 ákimshilik aıyppul salynǵan.
«Taýardy aıyrbastap bermeý men qaıtarýdan bas tartý, sondaı-aq 10 kúndik merzimde shaǵymǵa jaýap berilmeýi boıynsha kóptegen shaǵymdar túsken. Sonymen qatar, áleýmettik mańyzy bar ónimderge ústeme baǵany zańsyz qosý derekteri jıi anyqtalǵan», - deıdi Nurlan Ábdıev.
Shaǵymdardyń basym bóligi bólshek saýda men elektrondy saýda salalarynan túsken. Al turǵyn úı-kommýnaldyq sharýashylyq salasyndaǵy shaǵymdarǵa qatysty departament jergilikti atqarýshy organdarmen birlesip, máselelerdi jedel sheshý joldaryn usynyp keledi.
Turmystyq qyzmet kórsetý salasynda da tutynýshylar sapasyz qyzmetke jıi tap bolady. Mundaı jaǵdaıda departament túsindirý jumystaryn júrgizip, sotqa deıin shaǵym jazýǵa kómektesedi jáne sot prosesterine úshinshi tulǵa retinde qatysady.
N. Ábdıev sondaı-aq 2025 jyldyń 13 naýryzynan bastap Qazaqstan Respýblıkasynyń Ákimshilik quqyqbuzýshylyqtar týraly kodeksine ózgerister engizilgenin habarlady. Bul ózgerister departamenttiń ókilettigin keńeıtken. Qazirgi ýaqytta memlekettik organ atalǵan kodekstiń 157, 190 jáne 193-baptary boıynsha ákimshilik isterdi qarap jatyr. 190-baptyń 5-bóligine sáıkes, tutynýshylardyń quqyqtary týraly aqparattyń bolmaýy, shaǵymdarǵa kesh jaýap berilýi jáne aqshanyń ýaqtyly qaıtarylmaýy sııaqty zańbuzýshylyqtar úshin salynatyn aıyppul mólsheri: shaǵyn bızneske – 10 AEK, orta bızneske – 15 AEK, iri bızneske – 25 AEK.
Departament jumysynyń negizgi baǵyttarynyń biri – áleýmettik mańyzy bar azyq-túlik taýarlaryna baǵa túzý kezinde deldaldyqpen kúresý. Osy toqsanda komıssııanyń 12 otyrysy ótip, 268 zańbuzýshylyq anyqtalyp, 235 ákimshilik hattama toltyrylǵan.
Departament mamandary azamattarǵa tutynýshylardyń quqyqtary, zańnamadaǵy ózgerister jáne satýshylardyń mindetteri týraly túsindirý jumystaryn jalǵastyra bermek.
