Merýert AQSh-tyń úzdik joǵary oqý oryndarynyń biri – Pensılvanııa ýnıversıtetinde magıstratýrany sátti aıaqtap, stýdentterge arnalǵan eń bedeldi halyqaralyq marapattardyń biri – «Penn Global Student Citizenship Award» ıegeri atandy. Bul marapat – jahandyq azamattyq qundylyqtardy ulyqtap, qoǵamdyq belsendiligimen erekshelengen sheteldik stýdentterge ǵana beriledi. 284 jyldyq tarıhy bar Penn ýnıversıtetinde bul marapat alǵash ret qazaqstandyq stýdentke tabystalyp otyr.
Magıstratýrada oqyǵan kezeńde Merýert bilim salasyndaǵy teńdik pen ınklıýzııa taqyryptarynda zertteýler júrgizip, globaldyq saıasat ortalyǵynda tájirıbeden ótti. Ol ýnıversıtettik sharalarǵa belsene aralasyp, stýdenttik úkimettiń prezıdenti bolyp saılandy. Bul – bilim men kóshbasshylyqty ushtastyra bilgen jas ǵalymnyń taǵy bir jarqyn jetistigi. Ýnıversıtettiń resmı saıtynda: «Merýert Qazaqstandy akademııalyq jáne qoǵamdyq ómirde laıyqty ári maqtanyshpen tanystyryp júr» dep erekshe atap ótilgen.
2025 jylǵy kóktemde Merýert Bıjanovaǵa taǵy bir asa mańyzdy múmkindik týdy – Ulybrıtanııanyń Oksford ýnıversıtetinen PhD (fılosofııa doktory) baǵdarlamasyna shaqyrtý aldy. Ol bilim berý fılosofııasy baǵyty boıynsha doktorlyq oqýyn 2025 jyldyń qazan aıynda bastaıdy.
Merýerttiń ómir joly – jastarǵa arnalǵan shynaıy motıvasııa, tabandylyq pen bilimniń jemisti nátıjesi. Ol halyqaralyq deńgeıde Qazaqstannyń atyn abyroımen shyǵaryp júrgen, jańa býyn kóshbasshylarynyń jarqyn ókili.
