Petropavl áıelder kolonııasynda 44 sottalýshy dıplom aldy

PETROPAVL. 22 maýsym.  Oblys ortalyǵynda ornalasqan áıelder kolonııasynda ótken qos shara merekedegideı uıymdastyrylyp, sottalýshylarǵa joǵary kóńil-kúı syılady. Bul týraly egemen tilshisi habarlady. Munda 18 jastan 30 jasqa deıingilerge orta bilim alý mindetti. Bıyl olardyń qataryn 8 sottalýshy tolyqtyrdy. Olarǵa 12 jyldyq mektepti bitirgendigi týraly attestat saltanatty túrde tapsyryldy.  Solardyń biri Ásel Ońaıbaeva jasaǵan qylmysy úshin   5 jylǵa bas bostandyǵynan aırylsa, 2 jylyn tepti. Attestat alǵannan keıin bilimin ári qaraı jalǵastyrýdy kózdep otyr. Bul sharanyń sońy taǵy bir qýanyshqa ulasty. Atap aıtqanda, 44 qyz-kelinshektiń 23-i qurylys, 21-i tiginshi mamandyqtaryn alǵanyn kýálandyratyn dıplomdarǵa ıe boldy. Petropavl kásiptik tehnıkalyq kolledjdiń dırektorynyń mindetin atqarýshy Talǵat Qabdýlınniń aıtýynsha, úsh kolonııanyń sottalýshylary on aı oqyp, kásiptik mamandyqqa baǵdarlanady. Materıaldyq baza, kabınetter jaqsy jabdyqtalǵan. «Kolonııada   tigin sehy jumys isteıdi.   Sottalýshylardyń bir bóligi jumyspen qamtylǵan. Jalaqylary arnaıy esepshotqa ýaqytyly aýdarylyp turady», deıdi ES-164/6 túzetý mekemesi basshysynyń tárbıe jónindegi orynbasary Aıqyn Bájenov. О́mir Esqalı. Derek, sýret: egemen.kz