Jaqsylyq Úshkempirov atyndaǵy Jekpe-jek saraıynda aldymen ashylý saltanaty rásimi ótti. Rásimde Qazaqstan Respýblıkasynyń Týrızm jáne sport mınıstri Erbol Myrzabosynov sóz sóıledi.
«Prezıdentimiz Qasym-Jomart Toqaev sport – elderdi biriktiretin altyn kópir degen. Bundaı aýqymdy is-shara buqaralyq jáne kásibı sportty damytýǵa arnalǵan basty baǵdardyń biri. Barsha sportshylarǵa sáttilik pen jeńis tileımin!», dedi mınıstr óz quttyqtaýynda.
Jarysty bizdiń áıelder quramasynan Nazym Qyzaıbaı bastap berdi. 48 kg salmaqta óner kórsetetin ol alǵashqy jarys jolynda qarsylasy kanadalyq Prııanka Dıllondy aıqyn basymdyqpen jeńdi. Qarsylasyn tyqsyrǵan Nazymnyń jeńisine tóreshiler shek keltirgen joq.
Odan 54 kg salmaqta Ánel Saqysh ta germanııalyq Tatıana Obermaıerdi ońdyrmaı 3 ret nokdaýnǵa túsirý arqyly aıqyn basymdyqpen jeńip kelesi kezeńge shyqty. Onyń endigi qarsylasy azýly Azııa chempıony Ferýza Kazakova bolmaq.
Sodan soń 60 kg salmaqta Vıktorııa Grafeeva qýanyshymyzdy eseleı tústi. Ol óz kezeginde japonııalyq qarsylasyn jarys jolynan shyǵaryp jiberdi. Kelesi qarsylasy – Eýropa oıyndarynyń qola júldegeri, túrik boksshysy О́zer Gızzem.
Rıngke bizden tórtinshi bolyp Natalıa Bogdanova kóterilip, ol da jarysty sátti bastaı aldy. 70 kg-da synǵa túsken Natalıa úsh raýnd qorytyndysy boıynsha qarsylasy úndi boksshysy Sanama Chanýden ústem boldy. Endi kelesi kezeńde brazılııalyq arý Marııa Dos Santospen kezdesedi. Al erler arasynda ókinishke oraı Abylaıhan Júsipov jaraqat alyp qaldy. Negizi, kezdesý qorytyndysy boıynsha eki raýnd basym túsken. Alaıda, jaraqatyn teksergen dárigerler 3 raýndta jekpe-jekti toqtatty.
Al búgin ekinshi jarys kúninde Ánel Saqysh, Mahmud Sabyrhan, Nurbek, Aıbek Oralbaılar óner kórsetedi.
Nurasyl Muratbek,
L.Gýmılev atyndaǵy Eýrazııa ulttyq ýnıversıtetiniń 2 kýrs stýdenti
