Foto: Ashyq derekkóz
OSK – bul Qazaqstan azamattary men otbasylaryna qatysty málimetterdi biriktiretin sıfrlyq júıe. Qazirgi tańda kartada 20 mıllıonnan astam azamat nemese 6,2 mıllıonnan astam otbasy týraly aqparat jınaqtalǵan. Bul málimetter memlekettik organdardyń qoldanystaǵy aqparattyq júıeleri arqyly avtomatty túrde jańartylyp otyrady.
«OSK engizýdiń basty maqsaty – qazaqstandyqtardyń memlekettik qoldaý júıesine teń qoljetimdiligin qamtamasyz etý. Osyǵan baılanysty QR Áleýmettik kodeksinde Otbasynyń sıfrlyq kartasy áleýmettik saıasattyń orta jáne uzaq merzimdi mindetteri men baǵyttaryn aıqyndaý quraly retinde belgilengen. Sondaı-aq, OSK azamattardyń áleýmettik mártebesine baılanysty kepildendirilgen memlekettik qoldaýdyń qandaı da bir túrin alýǵa quqyly ekendigi týraly kúndelikti «elektrondyq habarlama» bolyp tabylady», dep habarlady Eńbek jáne halyqty áleýmettik qorǵaý mınıstrligi.
Qazirgi tańda sıfrlyq karta arqyly azamattar ótinishsiz resimdeı alatyn áleýmettik tólemderdiń 11 túri qoljetimdi. Olar:
- Eńbekke qabilettilikten aıyrylǵan jaǵdaıda tólem;
- Jumyssyz qalǵan jaǵdaıda tólem;
- Asyraýshysynan aıyrylǵanda tólem;
- Bala týýyna jáne bala kútimine baılanysty járdemaqylar;
- Múgedektigi bar balany tárbıeleýshige járdemaqy;
- Múgedektikke baılanysty járdemaqy;
- Kópbalaly otbasylarǵa arnalǵan járdemaqy;
- «Altyn alqa» jáne «Kúmis alqa» ıelerine beriletin járdemaqy;
- Ataýly áleýmettik kómek;
- Jerleýge arnalǵan birjolǵy tólem;
- Zeınetaqy tólemderi.
Sonymen qatar, karta «qandas» mártebesiniń aıaqtalý merzimi týraly, sondaı-aq jumyssyzdarǵa arnalǵan jumyspen qamtý sharalary jaıynda avtomatty túrde eskertý habarlamalaryn joldaıdy.
Memlekettik qoldaý sharalaryna quqyǵy anyqtalǵan azamattarǵa 1414 biryńǵaı baılanys ortalyǵynan SMS-habarlama joldanady. Qyzmetti paıdalaný úshin azamat tek kelisimin bildirýi qajet. Budan keıin ótinish avtomatty túrde resimdelip, tólemder alýshynyń bank shotyna aýdarylady.
