Mınıstr sportshylardyń sary qurlyq básekesinde el namysyn abyroımen qorǵap, halyqaralyq arenada laıyqty óner kórsetkenin atap ótip, bul – otandyq sadaq atý sportyndaǵy tarıhı jetistik ekenin aıtty.
«Sizderdiń jarqyn jetistikterińizdiń jáne memlekettiń jan-jaqty qoldaýynyń nátıjesinde elimizde sadaq atý sportyna degen qyzyǵýshylyq artyp keledi. Qazirgi tańda elimizde bul sport túrimen 7 000-ǵa jýyq adam aınalysady. Azııa kýbogindegi nátıje – Qazaqstan sportyndaǵy tarıhı jetistik. Sadaqshylarymyz buryn-sońdy mundaı jetistikke qol jetkizgen emes. Bul – sportshylar men jattyqtyrýshylardyń birlesken eńbeginiń jemisi. Azııa kýbogindegi zor tabys sadaq atý sportynyń tanymaldylyǵyn odan ári arttyra túsedi dep oılaımyn», dedi Erbol Myrzabosynov.
Týrızm jáne sport mınıstri qurlyqtyq jarysta úzdik nátıje kórsetken Adel Jeksenbınova, Vıktorııa Lıan, Dilmuhamet Musa, Býned Mırzametov, Andreı Tıýtıýn jáne Roksana Iýnýsovany Qurmet gramotasymen marapattady. Al ulttyq quramanyń bas jattyqtyrýshysy Baýyrjan Joldybaevqa Alǵys hat tabystady.
Aıta keteıik, 15–20 maýsym kúnderi Sıngapýrde ótken Azııa kýboginiń ekinshi kezeńinde Qazaqstan quramasy erler arasyndaǵy komandalyq jáne aralas komandalyq synda altyn júlde ıelendi. Al áıelder arasyndaǵy komandalyq jarysta jerlesterimiz qola júldege qol jetkizdi.
