- 3-6 shilde aralyǵynda Almatydaǵy Balýan Sholaq atyndaǵy sport saraıynda belgili qoǵam qaıratkeri, kezinde elimizdiń boksy men dzıýdosyn órge súırep, sol federasııalarǵa jetekshilik etip, halyqaralyq uıymdarda da túrli basshylyq qyzmet atqarǵan Beket Mahmutovty eske alýǵa arnalǵan Azııanyń ashyq kýboginiń jalaýy jelbireıdi. Jasóspirimder men jastardyń basyn qosatyn jarysta elimizden bólek, AQSh, Ázerbaıjan, Qyrǵyzstan, Tájikstan, О́zbekstan, Lıvan, Mońǵolııadan kelgen 700-den asa tatamı sheberleri baq synaıdy. Sonymen qatar saıys barysynda tóreshiler men bapkerlerge arnalǵan halyqaralyq semınar uıymdastyrylady. Oǵan Polsha, Mysyr, Ońtústik Koreıa, Qyrǵyzstan, Úndistan, Iran, Nıderland, Japonııa, Saýd Arabııasynan kelgen 80-ge jýyq bilikti maman qatysady.
- Vetnamda mýaı-taıdan Azııa chempıonaty aıaqtaldy. Dodada elimizdiń 24 sportshysy baq synap, solardyń jeteýi jeńis tuǵyrynyń eń bıik satysyna kóterildi. Jalpy esepte jerlesterimiz tek Taıland quramasyn alǵa jiberip, ekinshi oryndy ıelendi.
- Horvatııanyń Zagrebinde ótken halyqaralyq týrnırde elimizdiń ústel tennısshileri sátsiz óner kórsetti. Alǵashqy aınalymda Serik Jubanov germanııalyq Sendrık Meıssnerden utylsa, Dastan Kenjeǵulov qytaılyq Sıýı Haıdýnge jol berdi. Aıdos Kenjeǵulov ýelstik Djoshýa Steısıge san soqtyrǵanymen, ekinshi kezeńde Qytaı eliniń ókili Sıýı Inbınge ese jiberdi.
- Fýtboldan elimizdiń premer-lıgasynyń 14-týry mynadaı nátıjelermen aıaqtaldy: «Ulytaý» – «Jetisý» 1:2, «Atyraý» – «Oqjetpes» 0:0, «Tobyl» – «Jeńis» 2:2 , «Turan» – «Aqtóbe» 0:3, «Qaısar» – «Elimaı» 1:2, «Ordabasy» – «Qaırat» 0:1, «Astana» – «Qyzyljar» 3:3. Jarys kestesinde «Astana» áli de kósh basynda tur. Elordalyq klýbta 34 upaı bar. Ekinshi, úshinshi oryndarda – «Qaırat» (33 upaı) pen «Aqtóbe» (29 upaı).
- Fýtzaldan elimizdiń chempıony anyqtaldy. Almatyda ótken «Qaırat» pen «Semeı» arasyndaǵy tórtinshi kezdesý 4:3 esebimen aıaqtaldy. Alań ıeleri sapynan Jýlıo Zanotto (10-mınýt), Birjan Orazov (13-mınýt), Alısson (17, 38-mınýttar) mergendik tanytsa, qonaqtar arasynan Dedezıno Anderson (11-mınýt), Kamıl Gereıhanov (35-mınýt), Igıta (36-mınýt) nysanany dál kózdedi. Esterińizge sala keteıik, qos komanda arasyndaǵy alǵashqy matchta «Semeı» jeńiske jetken edi. Alaıda odan keıingi úsh oıynda almatylyqtar basymdyq tanytty.
- 4-10 shilde aralyǵynda Astanada aýyr atletıkadan jasóspirimder men jastar arasynda ótetin Azııa chempıonatynda elimizdiń namysyn 36 órenimiz qorǵaıdy. Baq synaýshylar qatarynda Darıa Balabaıýk (63 kg), Aıanat Jumaǵalı (77 kg), Álıhan Áskerbaı (71 kg), Edige Emberdi (79 kg), Denıs Polýboıarınov (94 kg), Ańsar Tursynbek (+94 kg), Saǵynbek Samarqan (+110 kg) syndy saıypqyrandar bar.
