Qostanaıda oblystyq QHA-nyń sessııasy ótti

QOSTANAI. 22 maýsym. Qalada oblystyq QHA-nyń sessııasy ótti. Bul týraly egemen.kz tilshisi habarlady. Halqymyzda «bir kún urys bolǵan úıden qyryq kún nesibe kóteriledi» degen sóz bar. Syılastyǵy, yntymaǵy joq, berekesiz otbasynyń ómir shyndyǵynan alynǵan bul támsildiń rastyǵyn aınalamyzdaǵy elderdiń ómirinen de kórip otyrmyz. Bir aýa jutyp, bir jerdiń sýyn iship otyrǵan halyqtar bir-birine myltyq kezengen elderdiń berekesizdiginen balanyń qarny ash, ananyń kózi jylaýdan keppeıdi. Ondaı elderdiń damýy qumdaı sýdyrap, keıin ketetini búgingi kúnniń shyndyǵyna aınalǵan. Elbasy Nursultan Nazarbaevtyń sardar saıasaty arqasynda Qazaqstandy jaılaǵan ult pen ulystar syılasyp, tatý-tátti ómir súrýde.  Birliktiń, tatýlyqtyń Qazaqstandyq úlgisi jasaldy. Jaqynda Qazaqstan halqy Qostanaı oblystyq assambleıasynyń HHSh sessııasyna qatysqan Parlament Májilisiniń depýtaty Zýhra Saıapova Qazaqstannyń damýyna tirek bolar, serpin berer basty kúsh – halqynyń birligi, dostyǵy, berekesi ekenin aıtty. «Qazaqstanda 100-den asa ulttar ókilderi tatý-tátti ómir súrip jatyr, olar Qazaqstandy óziniń otany dep sanaıdy.  Bul turǵyda keń qoltyq, meıirimdi, keńpeıil qazaq halqynyń úlesin, tıisti ornyn aıtýǵa tıispiz. Qazaqstandy meken etken barlyq ult pen ulystardyń judyryqtaı jumylǵan birligi saltanat qurǵanda ǵana elimiz memleket retinde de, qoǵam retinde de nyǵaıa, kúsheıe túsedi», dedi depýtat. Tarıh Qazaqstandaǵy osynsha ulttar ókilderin bir kemeniń ústine mingizip, taǵdyrlas etti. Endi dostyqtyń shynysy synbaýy úshin ony aıalap, baǵasyn bilýimiz kerek. Elbasy Nursultan Nazarbaevtyń saıasaty, onyń Qazaqstan halqyna arnaǵan Joldaýlary da osyǵan baǵyttaıdy. Qazaqstan halqy assambleıasynyń HHI sessııasynyń sheshimderine sáıkes assambleıalardy damytýdyń Tujyrymdamasyn júzege asyrý úshin oblystaǵy 18 oblystyq jáne qalalyq, aýdandyq 60 etnomádenı ortalyqtar tynbaı jumys isteıdi. Sessııada baıandama jasaǵan oblys ákiminiń orynbasary Murat Dáribaev óńirdegi berekeli jumystar men jurtqa dostyqtyń, birliktiń mańyzyn jetkize túsetin sharalardyń birsypyrasyn atap ótti. Bul oraıda oblystyq assambleıa janyndaǵy ǵylymı-saraptaý tobynyń músheleri, etnomádenı ortalyqtar jetekshileri oblys qalalary men aýdandarynda leksııalar oqıdy.  Oblystyq máslıhat depýtattarynan depýtattyq top qurylyp, qoǵamdyq jáne ultaralyq kelisim máseleleri boıynsha jumys isteıdi. Oblystyq ishki saıasat basqarmasy men Qazaqstan halqy oblystyq assambleıasy birigip, «zııalylar qonaqjaıyn» qurdy. Esepti merzimde onda Parlament Májilisi depýtattarynyń, oblystyq assambleıa músheleriniń, ǵylymı jáne shyǵarmashylyq, saıası partııalar, etnomádenı ortalyqtary ókilderiniń qatysýymen onshaqty sharalar ótkizildi. M.Dýlatov atyndaǵy ınjenerlik jáne ekonomıka, A.Baıtursynov atyndaǵy Qostanaı memlekettik ýnıversıtetterinde sońǵy bir-eki jylda Qazaqstan halqy assambleıasy kafedralary ashylyp, ol pikir almasý alańyna aınaldy. Qazaqstan halqy oblystyq assambleıasynda bastaý alǵan jumystardyń barlyǵy tek «ótse boldy» degen sharalar emes. Qazir «Qol jetimdi» qoǵamdyq birlestiginiń jetekshisi, psıhologııa ǵylymdarynyń kandıdaty Lılııa Sarkısıan júrgizip kele jatqan «Qazaqstan otbasylarynyń jáne otbasylyq qundylyqtardyń berik bolýyna baǵyttalǵan sharalar» jobasy oblysta keń qoldaý tapty. Osy joba sheńberinde otbasylyq ómirge daıyndaý úshin mektepterdegi 10-11 synyptarǵa jáne kolledjderde, joǵary oqý oryndarynda psıhologııadan fakýltatıvtik kýrstar engizildi. «QHA - 20 ıgilikti is» respýblıkalyq estafeta aıasynda Qostanaı oblysynda tańdaı qaqtyrar ister júzege asty. Osy estafeta sheńberinde oblystaǵy ardagerlerge,  balalar úıiniń tárbıelenýshilerine, áleýmettik az qorǵalǵan otbasylaryna 29 mıllıon 200 myń teńge kómek kórsetildi. Qazaq halqynyń asaryndaı, jaqsy iske etnomádenı ortalyqtarynyń barlyǵy da atsalysty. Mysaly, 8 balany asyrap alyp, ósirip otyrǵan Tólegenovter otbasyna salynyp jatqan úı osy etnomádenı ortalyqtar jınaǵan qarjyǵa bitip qaldy. Birliktiń berekesi osyndaı-aq bolar. Sessııada sóz alǵandar tarapynan jurtty jaqsylyqqa uıyta túser usynystar da boldy. «Eńbek qoǵamyn qalyptastyrý, eńbekti nasıhattaý úshin jyl aıaǵynda, egin jınaý naýqany qorytyndysy boıynsha «Qostanaı oblysynyń úzdik óndirisshisi», «Qostanaı oblysynyń úzdik dıqany», «Qostanaı oblysynyń úzdik mehanızatory» sekildi qoly kústengen, mańdaıyn kún qaqtap, jel  qaqqan eńbek adamyn marapattaıtyn tós belgiler shyǵarylsa, olardy yl boıy merzimdi basylymdarda nasıhattalsyn», «Bıylǵy  1 qyrkúıekte mektepterde alǵashqy sabaq Elbasynyń «100 qadam» ult josparynan bastalsyn», «Kelesi jyly Y.Altynsarınniń týǵanyna 165  tolýyna oraı, uly ustazdyń ıgilikti isteri boıynsha týrıstik marshrýt jasalsyn», «Kelesi jyly oblystyń qurylǵanyna 80 jyl tolýyna oraı marshrýt joldaryn keńeıte túseıik», «Balalar shyǵarmalaryn qaraıtyn kórkemdik keńes qurylsyn, sol arqyly oblystaǵy qalamgerlerdi osy ıgilikti iske tartaıyq» degen sekildi oılar aıtyldy. Sessııa jumysyn qorytyndylaǵan oblys ákimi, Qazaqstan halqy oblystyq assambleıasynyń tóraǵasy Nuraly Sádýaqasov halyq birligi eldegi barlyq damý satysyna qoldaý jasar kúsh ekenin aıty. Sondyqtan birlikti nyǵaıtýǵa umtyldyratyn mundaı usynystyń qaısysy da qoldaýǵa laıyq dedi. Sessııa sońynda qoǵamdyq kelisim men qazaqstandyq patrıotızmdi kúsheıtýge úles  qosqan qostanaılyqtarǵa  Qazaqstan halqy  assasbleıasynyń «Birlik» altyn medalin, «Qazaqstan halqy assambleıasyna 20 jyl» ıýbıleılik medali jáne Qazaqstan halqy assambleıasynyń Qurmet gramotasy  men  Qazaqstan halqy assambleıasynyń  Alǵys haty tabys etildi. Názıra Járimbetova. Derek, sýret: egemen.kz