Dárigerler poıyzy eń áýeli Batys Qazaqstan oblysynyń Shyńǵyrlaý stansasyna maýsymnyń 27-si kúni aıaldaǵan edi. Áleýmettik joba Qazaqstan Respýblıkasy Prezıdenti janyndaǵy Áıelder isi jáne otbasy-demografııa saıasaty jónindegi Ulttyq komıssııa, «Samruk-Kazyna Trust» qory jáne «Samuryq-Qazyna» kompanııalar tobynyń tapsyrysy boıynsha qolǵa alynǵan eken.
Poıyzdyń aǵa dárigeri Ásemgúl Sahanovanyń aıtýynsha, top quramynda túrli mamandyqtaǵy 30 dáriger – terapevt, travmatolog, kardıolog, ÝDZ dárigeri, otolarıngolog, nevropatolog, pedıatr, akýsher-gınekolog, okýlıst, ýrolog-dáriger, dıagnostıka dárigeri, dıagnostıkalyq dıagnostıka-dáriger, stomatolog-dáriger bar. Poıyzdaǵy sapaly qural-jabdyq, qondyrǵylar naýqasty túrli qajetti teksperýden ótkizip, nátıjesin taban astynda shyǵaryp bere alady. Stansa basyna kele almaıtyn syrqattardyń úıine portatıvti apparattardy alyp baryp, qaraý da qarastyrylǵan eken.
12 951 adam turatyn Shyńǵyrlaý aýylynda «temir joldaǵy emhana» 2 kún bolyp, halyqqa tegin qyzmet kórsetti. Odan keıin Amangeldi beketinde eki kún aıaldady.
«Jyl saıyn osy medısınalyq brıgadany kútemiz: bul biz úshin bilikti mamandardyń qyzmetin paıdalanýdyń tamasha múmkindigi. Sezimtal, bilikti dárigerler ujymyna alǵysymdy bildirgim keledi», deıdi Shyńǵyrlaý aýylynyń turǵyny Erbolat Álıev.
Poıyz quramynda dárigerden bólek, zańger men medıator da aýyl turǵyndaryna kómek kórsetip júr. Olar eńbek daýlaryn sheshý, áleýmettik tólemder alý úshin ótinim berý, zańnama normalaryn túsindirý jáne t.b. máselede kómek kórsetedi, deıdi poıyz medıatory Sh.Shalǵazına.
1 shilde kúni Tasqala aýdany aýmaǵyna jetken dárigerler «Semıglavyı Mar» stansasyna toqtady. Bul bekettiń aınalasynda aýdannyń birneshe shaǵyn eldi mekeni – Dostyq, Bastaý, Yntymaq aýyldary ornalasqan.
Bul jerde de jergilikti turǵyndar men atqarýshy organdar ókilderi poıyz ujymyn qýana qarsy aldy. Bul kezdesýge Batys Qazaqstan oblysy ákiminiń orynbasary, oblys ákimi janyndaǵy áıelder isteri jáne otbasylyq-demografııalyq saıasat jónindegi komıssııa tóraǵasy Qaıyrjan Meńdiǵalıev arnaıy kelip, jobany uıymdastyrýshylarǵa jáne elimizdiń Densaýlyq saqtaý mınıstrligine alǵys aıtty.
«Shalǵaı eldi meken turǵyndarynyń ómiri men densaýlyǵyn saqtaý, olardyń áleýmettik ál-aýqatyn qamtamasyz etý jolynda bul joba óte mańyzdy ról atqarady. Elimizdiń eń basty baılyǵy – adam jáne onyń densaýlyǵy. Sondyqtan «Salamatty Qazaqstan» poıyzynyń ujymyna halyqtyń atynan zor alǵys aıtamyn», dedi Qaıyrjan Ermekuly.
