Depýtattar Qaınarbulaq aýyldyq okrýginiń Taskeshý eldi mekeninde ornalasqan «Gen Group Kazakhstan» JShS-nyń banan ósiriletin jylyjaı keshenimen tanysty. 5,3 gektar aýmaqty alyp jatqan keshende TMD keńistiginde alǵashqylardyń biri bolyp tropıkalyq ónim jersindirilip, banan ósirý isi qolǵa alynǵan. Munda jylyna myń tonna ónim óndirilip, ishki naryqty qamtamasyz etip jatyr. Keshen dırektory Tımýr О́teshevtiń aıtýynsha, 2023 jyly jumysyn bastaǵan jobanyń alǵashqy kezeńiniń quny 1,056 mlrd teńgeni qurap otyr.
Májilis depýtattary kásipkerdiń bastamasyna qoldaý bildirip, elimizge ǵana emes, tutas TMD keńistigine tańsyq banan sharýashylyǵyn tabysty júzege asyryp jatqanyna rızashylyqtaryn jetkizdi. Jumysshy mamandyqtary jyly sheńberinde otandyq agrarlyq sala mamandaryn jańa tehnologııalarǵa úıretýge shaqyrdy.
Memleket basshysynyń otandyq agroónerkásip keshenin damytý baǵytynda bergen tapsyrmalaryna toqtalǵan Májilis depýtattary aýyl sharýashylyǵy básekege qabiletti ozyq sala retinde ekonomıkadaǵy basty qozǵaýshy kúshtiń birine aınalýǵa tıis ekenin jetkizdi. Bıznes te, memleket te osyǵan múddeli ekenin aıta kele, aýyl turǵyndarynyń tabysyn arttyrý máselesine basa mán beriletinin málimdedi.
Májilistiń baspasóz qyzmetiniń málimdeýinshe, sonymen qatar depýtattar Saryaryq eldi mekenindegi «Kómesh balyq» JShS-nyń balyq ósirý jobasymen de tanysty. Dáýletaly Abdramanov jetekshilik etetin bul kásiporyn shabaq ósirip, taýarly balyq óndirý isin jolǵa qoıǵan. 259 gektar jerde toǵandar salyp, atalyq-analyq balyq túrlerin ósirip jatqan kásiporyn jylyna 721,6 tonna ónim alyp, ishki naryqty sapaly balyqpen qamtyp otyr. Joba quny 750 mln teńgeni quraıdy jáne munda turaqty jumys oryndary ashylǵan.
Májilis depýtaty Qaırat Balabıev jastarǵa qoldaý kórsetýdiń, qabyldanǵan zańdardy halyqqa túsindirýdiń máni men mańyzyna toqtaldy.
«Bul kezdesýlerdiń maqsaty – «AMANAT» fraksııasy bastamashy bolǵan zańdardyń paıdasyn jurtshylyqqa túsindirý. Memleket basshysynyń Jarlyǵymen 2025 jyl «Jumysshy mamandyqtar jyly» bolyp jarııalandy. Ataýly jylǵa oraı, kásiporyndardyń, sharýashylyqtardyń jumysymen tanysyp, bolashaǵynan úmit kúttiretin kásibı mamandardy partııalyq qyzmetke tartýdy maqsat etip otyrmyz. Biz óz isiniń bilikti mamany sanalatyn jastarǵa qoldaý kórsetýimiz qajet. Partııa bergen ýádelerdiń, saılaýaldy baǵdarlamanyń oryndalýy da udaıy nazarymyzda tur. Qazir jylyjaı sharýashylyqtary qarqyndy damyp jatyr. Oǵan dálel – banan ósiretin jylyjaı sharýashylyǵynyń jumysy. Elimizde jańa Sý kodeksi qabyldandy, balyq sharýashylyǵyn damytýǵa múmkindik beretin quqyqtyq mehanızmder túzildi. Nátıjesinde elimiz boıynsha balyq sharýashylyǵy ilgeri qadam basyp keledi», dedi Q.Balabıev.
