Ál-Farabı atyndaǵy Qazaq ulttyq ýnıversıtetinde Parlament Májilisiniń Halyqaralyq ister, qorǵanys jáne qaýipsizdik jónindegi komıtetiniń múshesi, halyq qalaýlysy Qýanysh Sultanovtyń qatysýymen «Turaǵy bir, urany bir, búgini – beren, erteńi – eren» atty patrıottyq kezdesý sharasy bolyp ótti.
Memlekettiń ishki birligi men yntymaǵyn nasıhattaıtyn bul sharaǵa ál-Farabı atyndaǵy bilimniń qarashańyraǵyn basqaryp otyrǵan Ǵalym Mutanov, «Qazaq gazetteri» JShS-niń bas dırektory Jumabek Kenjalın, Qazaqstan Respýblıkasy Prezıdenti baspasóz qyzmetiniń Almaty bólimshesiniń basshysy Valerıı Jandáýletov, belgili jazýshy Rollan Seısenbaev, «Mysl» jýrnalynyń redaktory Seıdahmet Quttyqadam, Qazaqstan jýrnalıster akademııasynyń prezıdenti Saǵymbaı Qozybaev qatysty.
Kezdesýde Memleket basshysy Nursultan Nazarbaevtyń bastamasymen qurylǵan Qazaqstandy meken etýshi barsha ult ókilderiniń kıeli shańyraǵy jáne onyń el birligi men yntymaǵyna qosyp otyrǵan úlesi sóz boldy.
– Elimiz álemde toleranttylyq pen yntymaqty qoǵamnyń úlgisi retinde nasıhattalyp keledi. Túrli ult ókilderi, etnostyq toptar, ózge din ıeleri teń dárejede eldegi memlekettiliktiń nyǵaıýyna úles qosý ústinde, – dedi kezdesý barysynda depýtat Q.Sultanov.
Budan ózge, ýnıversıtet oqytýshylary men stýdentteri aldynda sóılegen sózinde halyq qalaýlysy Qazaqstandaǵy ózge ult ókilderi qazaq tarıhymen etene tanysýy kerektigin, qazaq ultynyń salt-dástúri men ádet-ǵurpyna kóńil aýdarý qajettiligin de tilge tıek etti. Kezdesý sońynda jastar depýtatqa suraqtaryn qoıyp, ózderine kerekti aqparatyna qanyqty. Ýnıversıtet basshysy Ǵalym Mutanov depýtat Qýanysh Sultanovtyń keýdesine «ál-Farabı atyndaǵy QazUÝ-ge – 80 jyl» altyn belgisin taqty.
Atalǵan shara Qazaqstan halqy Assambleıasynyń 20 jyldyq mereıtoıy qarsańynda uıymdastyryldy.
Qanat ESKENDIR,
«Egemen Qazaqstan».
ALMATY.
