Foto: egemen.kz
«Qazaq sut» Respýblıkalyq sút jáne Iri qara maldyń sút jáne aralas tuqymdary palatasynyń atqarýshy dırektory Azamat Saǵynbaev Qazaqstan sút sharýashylyǵynda buryn-sońdy bolmaǵan ósý qarqynyna jetkenin aıtty.
2023 jyldan bastap elimizde jıyntyq qýaty jylyna 300 myń tonnadan astam sútti quraıtyn 48 jańa sút-taýar fermasy iske qosylǵan. Jobalarǵa salynǵan ınvestısııalardyń jalpy kólemi 150 mlrd teńgeden asqan. Al 2020 jylǵa deıin respýblıka boıynsha jyl saıyn orta eseppen osyndaı eki ferma ǵana salynǵan eken.
Azamat Saǵynbaevtyń aıtýynsha, sút transformasııasynyń kóshbasshysy - Soltústik Qazaqstan oblysy. Onda 2021-2022 jyldary 21 kásiporyn iske qosylǵan. Sonyń arqasynda aımaq 2025 jyly elimizdiń agroqurylymdary arasynda sút óndirý kólemi boıynsha birinshi orynǵa shyqqan.
«Jańadan iske qosylǵan sút-taýar fermalarynda bir jaı sıyrǵa ortasha jyldyq sút kólemi 8,2 myń lıtrden keledi, al sútti sıyrlarda 11 myń lıtrge jetedi. Bul Eýropanyń sútti mol óndiretin elderiniń deńgeıimen sáıkes. Sút sharýashylyqtary óńirdegi óndiris salasyn ósimge bastap qana qoımaı, aýyldarda jumys oryndary men ınfraqurylym qalyptastyra alatyn quzyret ortalyqtaryna aınalyp jatyr», dedi ol.
Saladaǵy ósimge sýbsıdııa, qolaıly kepil sharttary bar 2,5-dyq nesıeler, «Keń dala» baǵdarlamasy arqyly tuqymdar men tyńaıtqyshtardyń qoljetimdi bolǵany, mal azyǵy bazasynyń damýy áser etken.
Palatanyń atqarýshy dırektory sút sharýashylyǵy salasynda eleýli tabysqa jetken SQO tájirıbesin búkil elge keńirek taratýdy usyndy. Ol úshin mınıstrlikter men ákimdikter tarapynan úlgilik jobadaǵy sheshimder men ınstıtýsıonaldyq qoldaý kerek.
