MÁMS paketinen alynǵan qarajatqa naqty toqtalar bolsaq, shyǵynnyń basym bóligi, ıaǵnı 43,8 mlrd teńgesi stasıonarlyq kómekke, shamamen 2,8 mlrd teńgesi kúndizgi stasıonar qyzmetine, 15,2 mlrd teńge konsýltatıvtik-dıagnostıkalyq qyzmetterge, joǵary tehnologııalardyń kómegimen jasalatyn operasııalarǵa 10,3 mlrd teńge, medısınalyq reabılıtasııaǵa 3,7 mlrd teńge jumsalǵan.
«Mindetti áleýmettik medısınalyq saqtandyrýdyń arqasynda azamattar jyl saıyn túrli hırýrgııalyq otalardy jasatýǵa múmkindik alyp otyr. Olardyń arasynda baǵasyn kópshiliktiń qaltasy kótere bermeıtin qymbat operasııalar da bar. Quny birneshe mıllıon turatyn qymbat otalardy saqtandyrylǵan azamattar tólegen jarnasynyń mólsherine qaramaı jasata beredi. MÁMS júıesindegi ortaq jaýapkershiliktiń máni osynda», dedi Áleýmettik medısınalyq saqtandyrý qorynyń Almaty qalalyq fılıalynyń dırektory Ilııas Muhamedjan.
Mysaly, osy jyly Almaty qalasynda jalpy alǵanda 8,8 mlrd teńgege 2995 operasııa jasalǵan. Bir otanyń quny orta eseppen 3 mln teńgege shyǵady. Sonymen qatar, 1871 neırohırýrgııalyq operasııa jasalǵan. Oǵan Qor 3,2 mlrd teńge tóledi. Tize men jambas býyndaryn almastyrý operasııalaryna degen suranys ta óte joǵary. Almatyda 2009 býyn almastyrý otasy jasalypty. Operasııalardyń jalpy quny 3,2 mlrd teńgege jetip jyǵyladyTaǵy da neıro-qan tamyr jáne qan-tamyr júıesine jasaǵan 2083 otaǵa Qor 2,9 mlrd. teńge tóledi. Sonymen qatar, ońtústik astanamyzda jalpy quny 244,7 mln teńgelik 38 baýyr, búırek jáne júrek almastyryldy. Mundaı bir otanyń quny 10 mln teńgege deıin jetip jyǵylady jáne búginde bul shyǵyndar MÁMS qarajaty esebinen ótelip jatyr.
Eń qymbat otalar úshtigine ımplanttalatyn qosalqy júrek júıesi (LVAD) kirdi, bul - júrekke qandy aıdaýǵa kómektesetin mehanıkalyq qondyrǵy. Ol translantasııany kútip júrgen nemese júregin almastyrýǵa bolmaıtyn naýqastarǵa qoldanylady. Bireýiniń quny – 77,5 mln teńge. 2025 jyly osyndaı 1 ota jasaldy;
Ekinshi orynda júrektiń mıtraldy qaqpaqshasyn almastyrý tur, onyń quny – 17 mln teńge. 2025 jyly osyndaı 2 ota jasaldy
Bul úshtiktiń ishinde allogendi gemopoetıkalyq diń jasýshalaryn almastyrý da bar, quny – 17 mln teńge.
