Buqardyń jyryna qaraǵanda, qarmaljyq túlki bolǵanda da, óte qundysy sekildi. Qas sypaıylar ǵana meımanasy asqan eldiń arasynda kıetini emeýrin etilgen óıtkeni. Buryn jatqa bilsek te, túpkilikti tııanaǵyn tappaı júrgen bul sózdiń mánisi jazýshy Qultóleý Muqashtyń «Qaramaljyq» atty áńgimesinen ashyldy.
«Tús mezgilinde, qaıdan sap ete túskeni belgisiz, qystaqtyń ıtin shýlatyp, Tasbazdyń syrtyndaǵy qyrdan jalt etip bir qaramaljyq túlki qashty.
Ertteýli turǵan qarager atqa mine sala, túlkiniń sońynan bul da salǵan. Mundaıda áýelden ańkós, saıatker adamnyń delebesi qatty qozatyn sııaqty, talaıdan boıdy býǵan qumarlyǵy órship, qıqýǵa basty.
– Aıt-eı! Aıt-t! Aıtt!..
Bul óńirde qyzyl túlki men qoıan-qarsaq órip júrgenimen, qaramaljyq kóp kezdese qoımaıdy. Aldyńnan alqym tusy men jelke qylshyǵy ǵana kókbýryl tartqan qap-qara túlkiniń tabany jaltyldap eliktire qashýy óte sırek kórinis. Bátshaǵar edáýir iri de eken ózi. Quıryǵyn kóterip alyp janushyryp barady» delingen jazýshy áńgimesinde. Bul kisi qaramaljyq dep jazypty, Buqar jyrynda qarmaljyq dep tańbalanypty. Kóneden jetken uǵymda eptegen daýys ózgesheligi bola bermeı me? Anyǵyn tilshiler aıtar. Bastysy – qara túlkini qazaq qarmaljyq ataıtyny. Bilgenge bul da marjan.
