Foto: phys.org
«Atyraý oblysynda ádette aılyq ortasha temperatýranyń qalypty kórsetkishi +25,6-27,9 gradýs aralyǵynda bolady. Al bıyl +26,9-dan +29,1-ge deıin qubylady. Bul kórsetkish kópjyldyq ortasha mánnen shamamen +1 gradýsqa joǵary bolǵaly otyr. Biraq shildeniń ekinshi jáne úshinshi onkúndiginde kún qatty ysıdy. Aýa temperatýrasy +38°S-tan +43°S-qa deıin kóteriledi. Osy kúnderi túngi aýa temperatýrasy +22°S pen +27°S aralyǵynda saqtalady», deıdi Aına Qazǵulova.
Keıingi birneshe kún boıy aýa raıynyń kúrt ysyǵany baıqalyp otyr. Atyraý oblystyq densaýlyq saqtaý basqarmasynyń shtattan tys bas terapevti Meıirgúl Kenjeǵalıeva osyǵan baılanysty turǵyndarǵa, ásirese, balalarǵa, qarttar men sozylmaly aýrýy bar adamdarǵa barynsha saq bolýdy eskertti.
«Aýa temperatýrasynyń joǵarylaýy aǵzanyń tez sharshaýyna, qan qysymynyń kóterilýine, júrek-qan tamyrlary jumysynyń álsireýine ákelip soqtyrýy múmkin. Osy kezeńde múmkindiginshe kóleńkede júrý, bas kıim kıip, suıyqtyqty kóp mólsherde tutynǵan jón. Kúnniń eń qyzatyn ýaqyty – saǵat 11:00 men 17:00 aralyǵynda dalada uzaq júrmeý kerek», deıdi Meıirgúl Kenjeǵalıeva.
