Foto: gov.kz
Respýblıkalyq bıýdjettiń 50%-dan astamy jyl saıyn áleýmettik salany qarjylandyrýǵa baǵyttalady. Qarajat zeınetaqyǵa, bıýdjet qyzmetkerleriniń jalaqysyna, kóp balaly otbasylarǵa, az qamtylǵan azamattarǵa, múgedektigi bar adamdarǵa arnalǵan járdemaqylarǵa, sondaı-aq mektep, aýrýhana salýǵa jáne ınfraqurylymdy damytýǵa jumsalady. Bul baǵytta Úkimet júıeli jumys júrgizip jatyr.
Sonymen qatar qazirgi ýaqytta bólinetin resýrstardy paıdalaný tıimdiligine baqylaý kúsheıtilgen. Birqatar parametr men tásilderdi qaıta baǵalaý júrgiziledi.
Premer-mınıstr júrgizilgen taldaý sheńberinde áleýmettik ádilettilik qaǵıdatyna qaıshy keletin qoldaý sharalaryn teris paıdalaný faktileri anyqtalǵanyn atap ótti.
«Biz qazir elimizdiń barlyq halqyn alty sanatqa bólgen jolmen júrip jatyrmyz. Otbasynyń sıfrlyq kartasy jumys isteıdi, derekter sıfrlanǵan, barlyǵy ál-aýqat deńgeıi boıynsha bólinedi. Altynshy sanat – tabys deńgeıi jetkilikti joǵary otbasylar men adamdar. Altynshy sanatty biz áleýmettik kómek alýshylar qatarynan alyp tastaımyz, ózin qamtamasyz ete almaıtyndarǵa, jumys isteı almaıtyndarǵa kóbirek kóńil bólemiz. Mysaly, balalarmen aınalysatyndyqtan kóp balaly analar, densaýlyǵyna baılanysty múmkindigi shekteýli azamattar jumys isteı almaıdy. Biz olarǵa kóp kóńil bóletin bolamyz. О́kinishke oraı, bizde áleýmettik táýeldilik pen áleýmettik alaıaqtyq faktileri bar. Biz qazir ár isti jeke-jeke sheship, barlyq basqa shemalardyń jolyn kesemiz. Áleýmettik kómek ózin qamtamasyz ete almaıtyn adamdarǵa kórsetilýi tıis», dedi Oljas Bektenov.
