Foto: anatili.kazgazeta.kz
Ulttyq qaýipsizdik komıtetiniń málimeti boıynsha, Abaı oblysy aýmaǵyndaǵy shekaralyq baqylaý bólimsheleri maýsym aıynda birneshe zań buzýshylyqty anyqtap, qylmystyq isterdi boldyrmaǵan. Máselen, 15 maýsymda «Aýyl» avtomobıldik shekaralyq baqylaý bóliminiń shekarashylary ıisshil ıttiń kómegimen reıstik avtobýspen Reseıge bet alǵan Qazaqstan azamatynyń júginen jasyl tústi, erekshe ıisti, ósimdik tektes zat – shamamen 5 gramm marıhýana tárkilegen.
Ishki ister mınıstrliginiń dereginshe, elimizde jyl basynan beri mundaı 4 myń tonna esirtki tárkilengen bolsa, sonyń birqatary Abaı oblysynyń shekara qyzmetiniń eńbegi eken. Bul oraıda maýsym aıynda bastalǵan «Qarasora» jedel-aldyn alý is-sharasy da esirtkimen kúreske oń septigin tıgizip, Abaı oblysyndaǵy iri ishki esirtki arnasy joıyldy. «Qarasora» operasııasy maýsymnyń 1-inen qazannyń 31-ine deıin jalǵasady.
Al 13 maýsymda Abaı shekarashylary zańsyz valıýta alyp ótý áreketine de tosqaýyl qoıdy. Reseı azamaty elimizden 1 386 833 rýbl (8,3 mln teńgege jýyq) kóleminde qolma-qol aqshany zańsyz alyp ótpek bolǵan. Bul soma ruqsatty mólsherden 3 mln teńgeden artyq. Zańdy belden basqan azamat memlekettik shekaradan ótkizilmeı, ýákiletti organdarǵa tapsyryldy. Buǵan qosa 17 maýsymda shekara qyzmeti qos azamattyq faktisin anyqtaǵan. Reseı azamatynyń qos azamattyǵy bar ekeni anyqtalyp, Qazaqstan shekarasynan ótkizilmedi. Onyń isi Semeı qalasynyń kóshi-qon qyzmeti polısııasyna berildi.
Sonymen qatar Shekara qyzmeti men kóshi-qon zańynyń buzylýyna qatysty birneshe qylmystyq áreket anyqtalǵan. 13 maýsymda Mońǵolııa azamaty elde tirkeýsiz 50 kún júrgeni úshin sot sheshimimen 5 jylǵa elden shyǵarylsa, 16 maýsymda Qytaı azamaty tirkeýsiz júrgeni úshin eskertý aldy. 17 maýsymda Tájikstan azamaty elde tirkeýsiz 84 kún júrgeni úshin aıyppul salynyp, shekaradan ótkizilmedi.
El shetin kirpik qaqpaı kúzetetin shekarashylardyń eńbegi mol ekeni daýsyz. El qorǵandary shekara shebin berik kúzetip, júıeli jumysyn jalǵastyra bermek.
Abaı oblysy
