«Bir aýyl – bir ónim» jobasyna bıyl oblys boıynsha 42 ótinim qabyldandy. Qatysýshylardyń basym bóligi Semeı qalasynan (34 adam), qalǵan 9-y – aýdandardan. Qatysýshylar tamaq ónerkásibi, ulttyq naqyshtaǵy kıim, qolóner buıymdary, saz jáne bylǵary zattar, tabıǵı sabyn, aǵashtan jasalǵan buıymdar, bódene eti men jumyrtqasy, shópten daıyndalatyn tunbalar baǵytynda ónim usyndy.
Oblys ákimi Berik Ýálı is-sharanyń ashylýyna qatysyp, baıqaý qatysýshylaryna sáttilik tilep, kásipkerlikti árdaıym qoldaýǵa daıyn ekenin jetkizdi.
– Abaı oblysynyń kásipkerleri osy baıqaýǵa jyl saıyn zor qyzyǵýshylyqpen qatysyp keledi. Bıyl óńirimizden 13 kásipkerlik sýbektisi resmı túrde qatysýshylar tizimine endi. Bul – óńirimizde sapaly ónim shyǵaryp otyrǵan kásipkerler qaýymynyń belsendiligin, jaýapkershiligin aıqyn kórsetedi, – deıdi aımaq basshysy.
Qala turǵyndary men qonaqtary kórmeni aralap, túrli azyq-túliktiń dámin tatyp, unaǵan taýaryn satyp aldy. Al joba aıasynda qatysýshylarǵa keńes berý, oqytý, logotıp jasaý, marketıngtik qoldaý kórsetý jáne 5 mln teńgege deıingi grantqa qatysý múmkindigi usynylǵan.
– Biz ulttyq taǵam ónimderin, sonyń ishinde dıetalyq taǵamdardy shyǵaramyz. Baýyrsaq óndiremiz, olar «Kırıeshkıdiń» ornyn basa alady. Kórmeler men baıqaýlarǵa jıi qatysamyz, kompanııamyz búkil el kóleminde keńinen tanymal. Naryqqa shyqqanyna 15 jyldan astam ýaqyt boldy. Osyndaı kórmelerdiń uıymdastyrylǵany qýantady. Bul – qala kásipkerlerine taýarymyzdy kórsetýge úlken múmkindik, – deıdi «Adal as» Trade saýda kompanııasynyń ókili Kırıll Florov.
«Qazaqstannyń úzdik taýary» óńirlik baıqaý-kórmesinde 10-nan astam kásipkerlik sýbektisi baq synady. Kásipkerler ónimderin «О́ndiristik maqsattaǵy úzdik taýarlar», «Halyqqa arnalǵan úzdik taýarlar» jáne «Úzdik azyq-túlik taýarlary» syndy 3 nomınasııada usyndy. Saraptamalyq top barlyq qatysýshynyń ónimin baǵalap, úzdikterin iriktedi. Eki joba boıynsha úzdik atanǵandar Astana qalasynda ótetin respýblıkalyq kórmege joldama alady.
Aıta keterligi, 2023 jyly aımaqtyń «Uk Unis» JShS shulyq-toqyma fabrıkasy respýblıkalyq baıqaýda jeńimpaz atanǵan. 1 387 qatysýshynyń ishinde úzdik toǵyzdyqqa engen atalǵan kásiporyn tórt jyl boıy «Qazaqstannyń úzdik taýary» belgisin qoldaný quqyǵyna ıe boldy.
Abaı oblysy
