Bul týraly О́ńirlik kommýnıkasııalar qyzmetinde ótken brıfıng barysynda oblystyq Tabıǵı resýrstar jáne tabıǵat paıdalanýdy retteý basqarmasynyń tabıǵat qorǵaý baǵdarlamalaryn iske asyrý bóliminiń bas mamany Nurdáýlet Muqashov málimdedi.
Bıyl sáýir-mamyr aılary aralyǵynda qarqyndy ótkizilip jatqan senbilikterge 227 myńnan astam turǵyn, 10 myńnan asa uıym jáne 4 myńnan astam arnaıy tehnıka jumyldyrylǵan. Aýqymdy naýqan barysynda 132 myńnan astam aýla, 1900 saıabaq pen skver, 100 myń metrge jýyq aryq júıesiniń mańy tazartyldy.
– Ekologııalyq tártipti nyǵaıtý baǵytynda keshendi is-sharalar júrgizilip jatyr. Atap aıtqanda, eki aılyq aıasynda 6000-ǵa jýyq quqyqbuzýshylyq anyqtalyp, 50 mln teńgeden astam ákimshilik aıyppul salyndy. Buqaralyq aqparat quraldary men áleýmettik jelilerde 200-den astam aqparattyq materıal jarııalanyp, turǵyndarǵa túsindirý jumystary belsendi túrde júrgizildi. Sonymen qatar mektepter men kolledjderde 600-den astam ekologııalyq shara ótti, – dedi Nurdáýlet Muqashov.
Kóktemgi kógaldandyrý jumystary da qarqyndy júrgizilgen. Bıylǵy 26 sáýirde ótken «Búkilqazaqstandyq aǵash otyrǵyzý kúni» kezinde óńir aýmaǵynda 23 myńnan astam kóshet otyrǵyzyldy. Sonymen qatar «Túlekterdiń aǵash egýi» jáne «Bolashaqty birge otyrǵyzamyz» ekologııalyq aksııalary barysynda 11 myńnan asa kóshet egilgen. «Semeı ormany» aýmaǵynda 1,5 gektar jerge 3400-den asa jasyl jelek otyrǵyzylǵan.
Jasyl ınfraqurylymdy damytý maqsatynda óńirde jańa qurylym – «Jasyl El Abaı» kommýnaldyq memlekettik mekemesi quryldy. Mekemeniń dırektorynyń orynbasary Damır Rahımjanovtyń aıtýynsha, aldaǵy ýaqytta kóshethana men jylyjaı salynyp, Semeı qalasynyń sol jaǵalaýynda «jasyl beldeý» qalyptastyrý josparlanǵan.
– Sonymen qatar Túıemoınaq aralynda ekosaıabaq pen balalarǵa arnalǵan demalys alańdaryn salý, Ozer aýyldyq okrýginde ashyq topyraqta kóshet ósiretin arnaıy agroaımaq daıyndaý jumystary qolǵa alynady, – dep túıindedi «Jasyl el Abaı» KMM dırektorynyń orynbasary Damır Rahımjanov.
Ekologııalyq mádenıetti nyǵaıtý, qorshaǵan ortany saqtaý jáne kógaldandyrý baǵytynda júıeli jumystar jalǵasyn tappaq.
