Beıneleý óneriniń biregeıleri

Kórmede HH ǵasyrda Qazaq­stan beıneleý óneri mektebiniń qalyp­tasý kezeńinde eńbek etken ár býyn ókilderiniń shyǵar­mashy­lyǵy toǵysyp jatyr. Olardyń qatarynda Moldahmet Kenbaev, Nıkolaı Hlýdov, Hakim­jan Naýryzbaev, Valentın Anto­shenko-Olenev, Valerıı Kapterev, Tatıana Glebova jáne t.b. bar.

Qazaqstanǵa XIX ǵasyrdyń sońynda kelgen Nıkolaı Hlýdov shyǵarmashylyǵynyń XIX ǵa­syrdaǵy realıstik keskindeme mektebi qazaq jerinde keńinen tanylyp, jalǵasyn tabýyna yqpaly zor boldy. Sýretshi kóp jerge saıahattap barǵan, sonyń nátıjesinde turmys pen tabıǵat kórinisterin beıneleıtin keskindemelik týyndylar jazdy.

Elimizdiń beıneleý ónerinde Qazaqstannyń halyq sýret­shisi Moldahmet Kenbaevtyń shyǵarmashylyǵy erekshe oryn alatyny belgili. Ol – akade­mııa­lyq kórkem bilim alǵan alǵashqy qazaq sýretshileriniń biri. Onyń týyndylary tereń mazmuny­men jáne ulttyq bolmysymen erekshelenedi.

Hakimjan Naýryzbaev – ulttyq músin óneriniń negizin qalaý­shy, Qazaqstan Respýb­lı­ka­synyń halyq sýretshisi. Ol mádenıet pen óner qaırat­ker­leri­niń portretter galereıasyn jasap, eńbek erleriniń kelbetin qaǵazǵa túsirip úlgergen.

Valentın Antoshenko-Olenev – respýblıkadaǵy asa kórnekti grafık-sýretshilerdiń biri bolǵan. Onyń shyǵarmashylyǵy janr, taqyryp jáne kóńil kúı turǵysynan alýan túrli. Sýretshiniń súıikti tehnıkasy – aq-qara lınogravıýra. Bul ádis arqyly ol túrli taqyryptardy sheber beınelegen.

Bul kórme qylqalam sheber­lerine kórsetilgen qurmet qana emes, sonymen qatar olardyń kóz­qarasymen sol dáýirge oralýǵa múmkindik berdi. Olar­dyń shyǵarmashylyq murasy ósh­peıdi, shabyt syılap, júrekti tebi­rentip, ótkenniń únin keler urpaqqa jetkizedi. Eń bastysy, sheksiz ýaqyt pen keńistiktegi adam bolmysyn eske túsiredi.