Jańa joba — ulttyq naqyshtaǵy romantıkalyq komedııa. Ol «Son-djeni ustap, qash», «Dámdeýishter men qumarlyq» jáne «Asúı» sııaqty tanymal týyndylardyń estetıkasy men atmosferasyn eske salady. Sıýjette romantıka, ázil jáne dám tatyp kórgiń keletin taǵamdar kórinis tapqan.
Serıal týǵanynan aspazdyqqa beıimi bar aýyldyq jigit jaıynda. Ol bir kúni óziniń týǵan ákesi eldegi eń úzdik aspaz ekenin biledi. Jigit ákesiniń meıramhanasyna qarama-qarsy oryn tepken kóshe taǵamdaryn ázirleıtin dúńgirshekke jumysqa ornalasady. Maqsaty — ózin tastap ketken ákesiniń qatelik jasaǵanyn dáleldeý jáne eldegi eń úzdik aspaz ataǵyn tartyp alý.
«Maǵan Qazaqstan úshin tosyn oqıǵa — aspazdyq taqyryp unady. Bizdiń elde túrli taǵam bar, al bul serıalda sonyń bárin kórsetýge múmkindik bar», — deıdi rejısser Aldııar Baırakımov.
Aıta keteıik, arnaıy osy serıal úshin avtorlar ulttyq stıldegi kóshe taǵamdaryn oılap tapty, ıaǵnı dástúrli as pen fastfýdty biriktirgen. Jobanyń ssenarısi Rabıǵa Ábilpatta Qazaqstanda mundaı jobanyń buryn-sońdy bolmaǵanyn atap ótti.
«Biz qazaq taǵamy týraly serıal jasaǵymyz keldi. Sol úshin de jańa taǵam túrlerin oılap taptyq. Mysaly, bizdiń dástúrli baýyrsaqqa negizdelgen «shaýrsak» degen jańa taǵam paıda boldy. Bul ıdeıany biz bir jyl buryn qolǵa aldyq. Bizge ashana, aspazdyq taqyryby unady, sodan osyndaı hıkaıa jasaýǵa bel býdyq», — dedi Rabıǵa.
Basty rólderdi Dıdar Tólegen, Shuǵyla Eshenova, Ǵanı Quljanov, Madına Jumabaeva, Rýstam Saıdhodjaev, Aıjan Pernebekova, Ernur Jeksenbaev jáne basqa da akterler somdaıdy.
Aspazdardyń rólin oınaǵan akterler arnaıy aspazdyq kýrstan ótken. Dıdar Tólegenniń aıtýynsha, jobaǵa deıin ol tamaq daıyndaýdy múlde bilmegen, al oqýdan keıin as úıde tájirıbe jasap úırene bastaǵan.
«Alǵash úırengen taǵamym — steık. Biraq men úshin eń qyzyǵy — soýstar boldy: shıe soýsy, balyqqa arnalǵan túrli soýstar. Solardy daıyndaý maǵan erekshe unady. Serıaldy kórgen kórermen otbasyǵa degen mahabbatty, taǵamǵa degen súıispenshilikti túsinedi. Sondaı-aq maqsatyń bolsa, oǵan jetý úshin sońyna deıin kúresý kerektigin sezinedi. Biz kórermenge dál osy oıdy jetkizgimiz keledi», — deıdi akter.
Kınopoısk qazaq kórermenine mentalıteti jaqyn oqıǵalardy qoldap, jergilikti kontentti damytýdy jalǵastyryp keledi. «Streethana» serıalynyń premerasy Kınopoısk platformasynda eksklıýzıvti túrde ótedi. Aıta keteıik, bul — Kınopoısktyń Qazaqstandaǵy ekinshi jobasy. Buǵan deıin alǵashqy serıaly — krımınaldyq komedııa janryndaǵy «Pod kontrolem» túsirilimi aıaqtalǵan bolatyn.
